當年今日

賽馬天下 - 左丁山

蘋果日報 2002/08/11 00:00


《賽馬天下》(RacingWorld)呢本月刊,冇收過好耐,只會在馬會會所見到,會員或會員親友鍾意嘅,就可以隨手攞一本,上兩季在賽馬日,任何入到會員棚嘅朋友都可以攞。但三日前,郵差送嚟《賽馬天下》,又恢復局部郵寄畀馬會遴選會員及馬主囉噃。以前在馬會馬場派書,可以慳番郵費,但保證唔到讀者係乜嘢人;郵寄畀所有會員,郵費不菲,但可以向廣告商拍心口話所有讀者,保證係有頭有面人物。
以前《賽馬天下》郵寄之時,適逢經濟都幾好,勉強能夠賺錢;呢兩年見到《賽馬天下》嘅頁數少咗,可以估計廣告收入下跌,睇怕要蝕本。幾日前收到風,話《賽馬天下》嘅擁有人──利豐雅高──嘅股東楊一貴先生上月不幸在美國逝世,其他股東唔知以後點睇呢本雜誌呢?楊先生一手從壹傳媒手上購入《賽馬天下》,代價好似接近六百萬元,買入八年之後,有冇賺得番呢?木宰羊。
「利豐雅高」已引入愛爾蘭股東,愛爾蘭人對印刷業務好有興趣,對出版《賽馬天下》有冇興趣?未打聽到。愛爾蘭係賽馬大國,愛爾蘭人或者唔會捨棄《賽馬天下》啩?之不過,今時今日,任何股東都要睇投資回報率,一切靠數字定奪,好難講感情啫。《賽馬天下》最賺錢時期,可能係奧馬勝(MatthewOram)主理時代,壹仔喺九○年買入,係憑感覺,好彩肥佬黎醒目,及時甩手。