噚日天氣轉涼，蘭西大清早就要開工，除咗陪新地郭炳江一齊做善事嘅百萬行之外，佢哋將軍澳清水灣半島，亦聯同無綫搞咗個新聞會，公布蘭西早兩日都提及過嘅玩遊戲送樓計劃，除咗新地售樓部要員外，大小明星亦有到場，見慣大場面嘅蘇仲強，對住娛記多過財記嘅場面，發言用字亦特別精采，當佢形容個電視節目同清水灣半島時，就刻意用「超級」二字，啱晒電視feel。
另外，可能見到長沙灣泓景臺內購理想，長實趙國雄噚日嘅心情亦好靚，當大家傾傾吓市況之際，趙生手電響起，發現佢個手機背有塊銀色嘢，佢傾完電話就話，塊嘢係防電波輻射嘅，電話都要健康啲咁話。

趙國雄彩芒顯身分
講開手電，趙生個電話係愛記首部附有「彩芒」嘅新款嘢，睇清楚，原來背脊重刻咗趙生個名，果然係身分象徵。
蘭西