金剛同陳蕊蕊拍拖多年，一直好恩愛，但今日就有消息話佢哋分手，原因唔係兩個人之間有第三者，而係金剛覺得兩個人性格唔夾，成日嘈交，大家睇法亦有分歧，既然唔開心，金剛就主動同蕊蕊提出分手。報道話金剛向傳媒承認分手，話今個月初自己主動提出，又話兩個人初初拍拖，已經成日為好少事嘈交，與此成日嘈交唔開心，所以決定長痛不如短痛，無謂再拖落去，雖然金剛曾試過挽救，但最終佢都係決定放棄呢段感情。

消息話金剛已經搬離佢同蕊蕊個愛巢，不過，因為今次係金剛主動提出，女方似乎一時間仲未接受到，佢被傳媒問到分手嗰陣，一度忍唔住喊出嚟，唔肯回應之餘，又話金剛未搬走屋企啲嘢，睇嚟蕊蕊真係好愛金剛呢！

據本報收到嘅消息，其實金剛一年前已經同蕊蕊提出過分手，但蕊蕊唔單止唔肯，仲以自殺嚟要脅金剛，金剛當時唔想女友有事，咪惟有一直忍忍忍囉！但忍咗成年，金剛最終都係頂唔住女友，所以最終決定提出分手。