現年44歲嘅陳松伶拍過《天涯歌女》、《笑看風雲》，以前曾為大台擔正唔少重頭劇，自從嫁咗畀細佢9年嘅內地男演員張鐸，松松就淡出香港娛圈。

松松今日喺facebook貼出佢同今年就36歲嘅老公張鐸一齊「初體驗」坐三輪車，留言：「AmazingMotorTricycleRide初體驗機動三輪車，挺享受的。」張鐸喺片中指，遇到風雨搵唔到車先坐三輪車，二人笑得好甜，睇嚟好開心!

松松仲放咗七張兩公婆嘅合照，留言：「初體驗挺享受，剛好在限號日，來不及滴滴，微涼夜，短距離，少於兩位。」兩公婆仲一齊扮到好驚，松松仲不時展露出幸福嘅微笑。早前松松仲同老公疑去咗中東旅行，真係好恩愛！

網民亦留言大讚松松係女神，仍然咁靚，更有網民寫道：「女神，你可以復出拍戲了，TVB江河日下，早不復當年輝煌，你忍心看她這樣嗎?」

據知，松松喺十多年嚟一直喺內地搵人仔，身家估計有半億，早年傳過陳松伶好「旺夫」，07年同張鐸拍拖後，令男方知名度大增，男方事業亦發展得唔錯，令松松可以過住少奶奶嘅生活，收山都冇有怕，得閒就去探老公班，勝在松松keep得幾好，一啲都唔似44歲吖嘛!