【本報訊】蘇永康在娛樂圈十七年，除公認是藝人中乖乖仔之外，人緣亦極好，不少圈中人昨日紛紛表態不相信他有食搖頭丸的習慣；另外，部份受訪市民亦認為蘇永康形象正派，對於他在台灣涉嫌藏毒被捕，均表示訝異。

「佢係最健康嘅」
藝人陳奕迅愕然地說：「康仔（蘇永康）佢點會咁做？講真定假？康仔係我識嘅artist（藝人）中最健康嘅一個，我唔相信呢件事，就算俾人拉都只係疑犯，唔係罪犯，或者係俾人嫁禍呢，等我了解吓先發表意見。」
作為蘇永康好朋友的張衞健表示：「等我了解清楚件事先，暫時我冇任何回應。」
曾經與蘇永康合作過電視劇《騎呢大狀》，並於上月蘇永康演唱會做嘉賓的陳慧珊知道此事後，表示不相信是事實，她說：「我唔信，佢平時好好仔，好勤力㗎，我唔信呢個係事實。做藝人形象好緊要，亦好影響到人，可能佢做歌手壓力大啲，驚啲碟賣得唔好。都係唔講咁多嘞，我都唔清楚件事。」
蘇永康早前在其個人演唱會上，邀得謝霆鋒擔任嘉賓，當時蘇永康還語重心長地叫謝霆鋒日後要生生性性，想不到如今蘇永康卻牽涉入藏有搖頭丸事件，對此，謝霆鋒昨日邊擰頭邊回應說：「絕對冇可能有咁嘅事！」

「用錯方法減壓」
梁漢文亦說：「我覺得件事冇可能，識佢咁耐佢都冇呢啲習慣，而且佢咁恨生BB，冇理由做啲咁嘅嘢！我都試過打電話畀佢，但搵唔到佢，康嫂我都有搵，但都搵唔到，我會盡力搵佢哋了解吓嘅嘞。」
另外，二十歲的市民劉小姐亦表示：「估唔到會係佢，後生仔就話啫，佢結咗婚都搞啲咁嘅嘢，真係估唔到。」
當空姐的容小姐說：「藝人可能壓力大，但係用錯方法去減壓，不過，藝人嘅行為會影響後生仔，應三思後行。」