一條食街：
入大埔食馳名雞王小籠包
在市區空氣污染指數持續高企的日子，我們靈活走位「北上」到大埔大明里搵食，呢處既有聞名區內區外，日日都有人排隊等買的雞王；亦有遠近馳名，日賣三百籠的小籠包，想一次過食勻，兼享隨餐附送的清新空氣和寧靜環境？從沙塵都市至此，半粒鐘而已，今晚一於諗諗佢！
記者：楊一凡
攝影：陳智良
大埔雞王日賣160隻
雞王反傳統，不用大堆鹽焗熟雞，以濃味上湯浸雞的方法去炮製招牌菜——鹽焗雞，新煮法入味之餘又可保持肉汁豐富，深受街坊愛戴，過時過節更創日賣200餘隻的紀錄。一場來到，咪走雞！
鹽焗雞$123/隻（堂食）
以濃味上湯浸熟肥雞，在出場前，不斷用上湯淋約十多二十次，然後上層油潤的精華上湯，保證雞肉出場前油水充足。
試味報告：雞肉入味又多汁，肉質好滑，所以小朋友連雞胸都食，不會一味爭食雞髀、雞翼。
醬爆海鮮$58
用香辣的蒜茸辣椒醬起鍋，放入蝦仁、魷魚、帶子和斑球等，兜一兜再拋兩拋，讓眾海鮮渾身都散發着香辣。
試味報告：魷魚很爽口、帶子也啖啖好肉，透過蒜茸及椒醬的引誘，鮮味湧晒出來。
原籠北菇蒸田雞$42
用適量調味和蠔油醃田雞，入籠前再撈老抽、北菇、木耳和紅棗等配料，蒸約五分鐘便可。
試味報告：田雞肉鹹香惹味，肉質很嫩滑，北菇和木耳索了些少田雞精華，很可口。
店名：大埔東江雞
電話：26502345
地址：大埔大明里12-14號舖
座位：約160個
營業時間：早上6時至午夜12時
付款方法：只收現金
小籠包王日賣三百籠
主攻上海菜，副攻四川菜的中菜館，無論是小籠包、炸排骨還是晚飯小菜，統統都遵照即叫即煮的美味原則，只要你肯抽空等一等，定能夾啱Timing——在至新鮮熱辣的那一刻去品嘗以下招牌菜式。
鮮肉小籠包下午茶價$15/籠
湯汁注滿封口透氣孔，超薄外皮透出飽滿肉餡，點睇都係熱辣辣，水盈盈，忍唔住要一啖吞落肚。上海人把小籠包倒轉，讓湯汁流到湯匙裏，吃包後才飲湯，全程不過幾秒而已。小籠包原價每籠$22。
紅穀米醬鴨$45
這道冷盤得花五小時去完成，把原隻肥鴨、紅米、八角和桂皮等同燜四個小時，直至味覺上無分你我融為一體，然後待涼，收到柯打後切片上碟。
試味報告：紅穀米醬甜中帶鴨肉的鮮甜，菜式一點也不肥膩，鴨肉香軟似鴨肝，連皮吃更覺香滑軟熟。
干煸四季豆$42(上)
干燒海花蝦$75(下）
雖說川菜是副攻，但味道極有水準，豆角和花蝦在川式調味和醬料相助下，跟肉末、蒜泥和薑等炒出香辣火花。
試味報告：兩道菜式充滿川式香辣味，送飯固然可激發你連扒兩碗的食慾，淨食能感受何謂炒到入味。
店名：川滬小廚
電話：26576838
地址：大埔大明里寶豐樓6號地下
座位：62個
營業時間：上午11時至午夜12時
付款方法：只收現金