當年今日

校友捐款 - 左丁山

蘋果日報 2002/05/30 00:00


馬主H同老友去睇法國大片《狙魔特攻》,呢套法國武打片雖然拖得長(約一百三十分鐘),但武打場面及恐怖氣氛,營造得好出色,啲法國演員好似個個跟過成龍、袁和平,拳打腳踢,似足李連杰大戰李小龍,好過癮噃。
呢套戲未曾上映,馬主H啲老友捐咗錢,有飛請埋馬主H去睇法國戲。點解捐錢呢?皆因中文大學校友為中大嘅中醫中藥研究所籌款,用電影首映為籌款綽頭。籌款要有綽頭至得,搵人捐錢都要有個藉口吖。呢晚就籌咗過一百萬元,幾好使㗎。
馬主H在放映前酒會,碰到一位外交官,問佢平時有冇捐款畀佢嘅母校。呢位外交官又幾闊佬噃,佢話每年捐錢畀三間學校:「我讀康奈爾,之後到耶魯攞碩士學位,後來又去約翰霍普金斯(JohnsHopkins)進修,所以每年捐三百五十(美元)畀康奈爾,三百五畀耶魯,百幾蚊畀約翰霍普金斯,畀咗好多年咯。」
呢樣就係美國大學傳統,香港學唔到。美國啲大學追蹤校友捐款,追得好犀利,個教育及人力統籌局副局長凌小姐就曾講過:「我去哈佛進修,返到嚟就俾哈佛追捐款,反而母校香港大學咁耐都冇問過我!」香港大專院校,以後唔慌會得到政府更多撥款,一定要加強籌款工作,多向校友追捐款至得。