徐濠縈（阿徐）、薛芷倫（Fanny）、文詠珊等人前晚現身中環，出席天機公關要員鄭紹康生日派對，作為老闆的賭王千金何超瓊亦有到賀。一身pink裙打扮、肯雅跑手膚色的阿徐與黃偉文齊齊前來，提到早前到華盛頓跑半馬成績理想，她笑言：「破咗自己個人紀錄，半馬成績1個鐘46分鐘，仲係明星隊第一，有中、港、台同美國嘅明星，不過都係業餘嘅，喺紐約慶祝幾日，但就唔捨得個女，加上要埋手工作，所以都要急急返港。」
提到陳奕迅（Eason）抱恙，日前更要取消南寧站個唱，她表示：「係，佢好病，燒到38度幾，呢幾日都好頻撲照顧下佢，𠵱家退咗燒好返啲，佢𠵱家每星期要拍杜琪峯嘅戲，weekend就要喺內地做騷，上星期取消咗南寧演唱會，呢個禮拜會繼續。」阿徐透露之前Eason英國做騷時，在飛機發燒：「我幫唔到佢，好無助。佢扁桃腺，大家知佢個人，要全力以赴，死都要上台。叫佢跟我跑步戒煙，畀佢鬧返轉頭。」

Fanny：冇晒癌細胞

此外，Fanny爆乳性感現身，Fanny更開心地表示癌症完全康復：「因為潛伏期有5年，今日啱啱五年，做咗大檢查，完全乾淨，冇晒癌細胞，好開心，𠵱家都要繼續食抗癌藥，因為越食得耐就越安全，唔會停藥住。」Fanny癌後有感而發，她表示：「𠵱家開始更保重自已，身體健康、健康飲食，愛惜身邊朋友，對社會有貢獻，正能量，要活在當下。」
採訪：羅慧敏
攝影：陳俊強