林憶蓮演唱會將於今晚舉行，她的舊愛許愿則趁勢推出憶蓮的精選唱片。不過，許愿強調他並非借舊愛斂財，而是趁機為憶蓮造勢，及期望將來二人可以在音樂上再度開花結果。

林憶蓮前度男友許愿，雖然跟憶蓮分手接近十年，但一直以來，他對憶蓮歌藝依然十分欣賞。許愿有見憶蓮今晚在紅館舉行個唱，於是趁勢推出一張憶蓮的精選碟，歌曲經數碼處理，碟名為《回．憶蓮》。
許愿強調是次推出憶蓮的精選唱片，賺錢只是其次，最主要的是他希望與憶蓮在音樂上可以再度合作，再次開花結果。

難捨憶蓮歌藝
許愿曾擔任憶蓮的形象顧問和唱片監製，先後為她塑造《激情》的爆炸頭野性形象，以及監製《野花》等唱片，雖然許愿跟憶蓮相戀四年後，在九三年正式分手，但他表示多年來對憶蓮的歌藝始終念念不忘。
許愿日前接受訪問時說：「雖然我同憶蓮喺感情上冇結果，但音樂方面就有幾好嘅結果。早排正東唱片公司話趁憶蓮喺香港開演唱會，斟我趁勢推出憶蓮嘅精選唱片，我一口答應，但我唔想求其炒雜碎咁出張唱片，於是我要求將啲歌重新用數碼處理，自己落手落腳花咗兩晚通宵時間去做。」

親自設計封套
問許愿可擔心被指借舊愛憶蓮來賺錢？他說：「係正東提出，由佢哋發行。無可否認，𠵱家個市唔好，大家有機會賺錢固然係好，但我嘅出發點唔係為咗賺錢，我只係希望唔好浪費憶蓮以前嘅歌，所以將呢啲歌重新數碼處理，等人有煥然一新嘅感覺。雖然我哋分開之後再冇聯絡，但我依然好欣賞佢嘅歌藝，希望將來有機會嘅話，可以再度合作。」
至於《回．憶蓮》唱片中，將收錄《野花》和《天大地大》等十六首歌曲，唱片封套選用當年憶蓮一些從未曝光的照片，並由許愿設計唱片封套。