當年今日

701收料站:建滔買電廠或有變

蘋果日報 2002/09/14 00:00


小初前日講到,有基金經理唔多滿意建滔化工(148)大拿拿7億元去投資電廠。噚日同建滔做過配股代理嘅歐資證券行,直情出埋報告請求建滔重新考慮取消呢單交易,以及調低建滔嘅盈利預測。
歐資證券行話,橫掂份合約冇法律約束力,不如唔搞好過搞。
不過,怪就怪在呢間歐資行雖然質疑電廠投資,但近日仍落力為建滔護航,頻頻掛牌買入,結果建滔呢兩日嘅股價都叫做守得住,成交量較平日增加好多。隻股噚日升1.9%,收5.35元,成交金額2900萬元。
經紀陳話,建滔舊年至今嘅升浪,一度炒過上去8.80元咁勁,唔多唔少都係由呢間歐資行一手湊大,有大錢搵時佢哋冇理由唔沽貨獲利,當然佢嘅客仔亦賺咗唔少。今次建滔投資電廠,觸發唔少沽盤,現時佢哋趁低位買番,一啲唔出奇,但至於股價係咪低處未算低,稍後就會見真章。
慕容小初