超人:做我新抱好lucky - 李八方

蘋果日報 2005/05/20 00:00


Richard李澤楷早前偕表妹、細舅父莊學海千金Karen一齊睇戲,被傳媒拍下照片,噚日李嘉誠被問到李澤楷係咪同表妹「拍拖」時,超人同李澤鉅即笑住否認,李嘉誠更話:「講笑咩,佢係細路女嚟,Richard細細個已經帶表妹食雪糕,呢個我清楚。」超人重話除咗呢個表妹,Richard都會帶另一個大啲嘅表妹去街。
除咗Richard嘅感情生活,大哥Victor李澤鉅太太王富信嘅生活,傳媒亦甚關注,早前有周刊拍得王富信去滑水,被問到滑水會唔會太危險時,李嘉誠就話:「滑水唔係危險……做我新抱好lucky,我唔會管。」李澤鉅更笑謂,佢細細個已滑水,玩咗幾十年。
下個月係父親節,問及點樣慶祝父親節時,超人話自己連生日都唔會大事慶祝,最多只係食餐飯,又指住坐喺身旁嘅Victor笑稱:「若果佢闊佬就買個蛋糕畀我,慶祝我生日。」
早前李嘉誠表示兒孫滿屋令自己愈住愈細,噚日佢又話由於地方有限,夜晚睇書時,經常會整跌其他書,所以想擴建大宅,不過就要搬咗先可以擴建咁話。佢又指住坐在另一邊嘅和黃董事總經理霍建寧:「呢度有好多同事住嘅地方大過我,好似隔籬呢個就係。」

傳真︰2623-9278
電郵︰[email protected]
empty
李澤楷早前同表妹Karen睇《星戰前傳Ⅲ》首映。
empty
李澤鉅話太太好細個已經滑水,唔怕危險。