當年今日

  何志平無厘頭扮鸚鵡 - 李八方

蘋果日報 2003/12/28 00:00


民政事務局局長何志平噚日公布區議會委任名單,咁近元旦大遊行,阿董又死唔肯順民意減少委任人數,你估政府唔驚會激起更多市民呢個星期四上街,重演7.1嘅震撼場面?
所以肥仔平噚日講嘢好小心,寧願答非所問,都唔會偏離官式答案。佢就好似隻鸚鵡咁,無論記者點問政府做乜唔聽民意,佢都不停重複話政府跟足法例,用以往委任區議員嘅先例做擋箭牌。記者又唔會好失望,因為原本都唔會有太大期望。
不過搞笑一刻出現喺記者會完結之時,準備走嘅何志平忽然行返轉頭,叫住記者話重有一件事。記者個個豎起耳仔,點知何局長由平安夜嘅垃圾講起,話雖然垃圾大減係好事,但最近大家都要多啲注意個人衞生。講委任變咗講個人衞生,肥仔平你都真係得㗎喇!
(圖)肥仔平一招答非所問,無厘頭又唔高招。



傳真︰2623-9278
電郵︰[email protected]