同新歡度生辰
馮仁昭四圍超:蘭子戴住舊愛厚禮

蘋果日報 2002/07/21 00:00


淑蘭(蘭子)前日三十三歲生日,佢喺生日前夕約咗舊愛祁文傑鋸扒、睇戲同行街,祁文傑重好大手筆咁送咗隻價值七千八百元嘅Bvlgari名表畀蘭子做生日禮物㖭!

男友贈吻
前晚蘭子就偕同佢個工程師男朋友William、傅明憲同何婉盈夫婦,一齊喺尖沙嘴半島酒店慶祝。William前日中午已經好識做咁送咗紮玫瑰花去港台畀女友,𠱁到蘭子好開心。蘭子前晚去慶祝生日時,佢左手仍然戴住舊愛祁文傑送嘅名表,可見蘭子幾咁重視呢份厚禮。而William就喺生日會上公開吻賀蘭子,𠱁得壽星女成晚笑到合唔埋口。
問蘭子有乜生日願望時,佢話:「我希望繼續開開心心,我今年嘅事業發展都好好,而男友William啱啱轉新工,我都希望佢可以工作愉快。」

王秀琳誓死不露胸前癦
王秀琳(Mango)噚日出席咗一個喺尖沙嘴搞嘅日本護膚品活動,佢上台唱歌時啲音響突然間壞咗,結果佢要清唱。Mango透露佢已經影咗新唱片封套,會有少少性感,但係就一定唔夠九人組合Cookies咁性感,Mango話:「我唔會着三點式影封面,每個人都有自己嘅底線,我嘅底線就係胸前粒癦。」
陳冠希下月出國語碟
陳冠希(Edison)噚日去咗旺角新世紀廣場,出席佢嘅新歌《冒險樂園》MV首播記者會。啱啱喺台灣錄完音返香港嘅Edison話:「隻國語碟已經錄好,八月尾會出。」怕唔怕同周杰倫比較?佢話:「我同周杰倫唔同level,佢啲音樂好有自己嘅味道,我都好想好似佢賣得咁好。」

尊特拉華達踏入亞洲
荷李活影星尊特拉華達(JohnTravolta)喺呢個月初展開佢嘅「友誼之旅」親善活動後,已經揸住架私人波音707飛機去咗好多地方,噚日佢終於嚟到亞洲,喺新加坡嘅樟宜機場降落。
尊特拉華達一落機就好友善咁敬禮,又同班機組人員大合照,之後重為喺機場等咗佢好耐嘅fans簽名㖭。

伊健想買島潛水
鄭伊健噚日出席喺時代廣場舉行嘅名表「TAGHeuer」宣傳活動。
伊健話早前佢去咗馬來西亞嘅小島潛水之後,覺得潛水好正,佢重諗過喺附近買個島㖭!問佢有冇諗過搞番個水底婚禮,伊健就話起碼要教識林珊珊同神父潛水先得。
克勤幫Kelly搞氣氛
李克勤同埋鄭中基前晚一齊擔任陳慧琳(Kelly)演唱會嘅嘉賓,鄭中基同Kelly合唱咗一首《都是你的錯》,加上克勤好識搞氣氛,令到現場觀眾反應好熱烈。而Kelly喺表演時着咗一件吊帶短裙,可能佢怕走光,所以坐喺度唔敢亂郁。

黃貫中珍藏朱茵靚相
黃貫中(阿Paul)噚日喺樂富為自己嘅甘肅攝影展進行剪綵,佢透露自己得閒都會同女友朱茵影吓相,不過就係以生活照居多,阿Paul好謙虛咁話自己未夠班幫女友影寫真集,但係都有啲私人珍藏。阿Paul重話下個月嘅尼泊爾之旅,都好想叫埋鍾鎮濤一齊去。

方力申機場跑圈好開心
方力申噚日去咗青衣城一個跳繩挑戰賽,幫啲小朋友打氣之外,佢重同一班來自加拿大嘅高手一齊跳繩。講到做運動,方力申就最開心咁話:「之前《百分百感覺》有一場戲係喺機場拍,凌晨時分冇人,我又有兩個鐘頭休息時間,就喺離境大堂跑咗四個圈,跑完之後成個人都舒服晒。」