今年9月誕生10周年的八達通，揚威海外成為本世紀偉大發明之一，「嘟」一聲，幾乎遍及全港每一角落，每人最少擁有一張八達通。經歷10年，八達通文化已滲透至不同階層，由最初一張「乘車證」，慢慢演變成「電子貨幣」，小至買份報紙，甚至買餸買衫都可以用。就算被視為「低消費」的長者和小童，八達通亦提供了乘車優惠，小童上學時可用作點名、借書之用，你用八達通又是甚麼理由呢？

記者：黃潔蓮　
攝影：陳陶鈞、黃潔蓮

10人講10年　點解用佢？
97年
Tobias：即日來回有着數

測試3年，97年9月八達通正式推出，首3個月便售出300萬張，主要用於地鐵、火車、巴士及小輪。家住將軍澳的Tobias就搭乜都「嘟」，專吼搭同一路線即日來回，搭九巴超過$15，回程車費最多有八折優惠；搭新巴即日來回就最多有八五折。

99年
長者黃伯：專揀星期日過海

八達通服務增加至零售店，同時亦可透過信用卡自動增值，行走於港島南區的小巴亦率先使用八達通。同年推出八達通千禧手錶。黃伯憶述以前星期日搭巴士，長者只需$1，現在已加至$2，所以要過海通常揀星期日，抵啲嘛！

00年
OLCathy：唔使記密碼

服務增加至便利店、快餐店、自動售賣機及停車場，渣打銀行推出個人八達通卡自動增值服務。同時亦採用於屋苑保安系統作「開門卡」之用。Cathy家住的大廈基於保安理由，差不多每兩個月就會換密碼，佢話邊記得咁多，用八達通開門就最方便。

01年
小學生Noddy：返學點名借書

八達通擴展至電車、纜車、公眾游泳池、運動場及馬場入場收費。在學校增設八達通網絡，用於點名、圖書證、出入保安及繳交學校費用等。連小學生都話：「嘟一嘟就可以點名，唔使老師逐一點名，而且去學校圖書館借書都係靠佢。」一年後更可用於過境巴士、超市、戲院及生活站都可以用八達通。

03年
車主Alex：泊車唔使搵散銀

服務擴展至展覽及會議登記、實惠及部份泊車咪錶轉用八達通拍卡。「泊街邊一個鐘都要$8，哪有那麼多零錢？還是八達通方便得多。」

主婦黃太：惠康購物可儲分

同年，全線惠康增設八達通付款及增值服務。黃太就貪去惠康一次過可買餸和日用品，同時亦可儲分，消費滿$200即儲$1，而且定期會有好多貨品有10倍積分，年中都慳回不少。

04年
主婦梁太：買餸用「亁淨」錢

「街市好多都唔收毫子，我又最怕買魚菜時找換的錢好污糟，八達通就亁淨利落得多。」3年前八達通應用於馬鞍山及將軍澳的「萬有」街市，梁太正正就住將軍澳。同年全港麥當勞，全港路邊泊車咪錶都轉八達通拍卡。

05年
大學生Karen：買衫都得

Bossini成為首家可使用八達通的服裝零售店。同年亦推出購物獎賞計劃「八達通日日賞」，拍卡消費儲分作消費付款之用。Karen除了平日在餅店買麵包外，在Bossini店內亦有使用，「T恤都是幾十至百零蚊一件，就算過了餘額，我有申請信用卡自動增值服務，可以即時過數，反而唔使簽卡咁煩。」

06年
幼稚園生May：唔怕找少錢

新界首批共20部的士可以八達通交易。八達通服務延伸至澳門的肯德基。發展的成熟程度，就連5歲的細路女都識得用盡佢來買薯條和軟雪糕，「媽咪都好放心俾我自己去買嘢食，因為攞住張八達通就唔怕計錯數找少錢啦！」

07年
OLJoey：專嘟自動販賣機

「晨早趕返工，買份報紙雜誌嘟一嘟就走得，而且在自動販賣機買汽水都用得，慳好多時間，唔使排隊。」八達通已全面攻陷港人生活！至今10年，目前市面上約有1,470萬張八達通流通，每天約有1,000萬宗交易，交易金額涉及7,300萬。

靠閃爆八達通發達

八達通帶給我們生活上的便利，亦有人因此而發達。從事鑽石行業的Thomas，眼見太太經常要在袋內尋找八達通幾乎翻箱倒籠，覷準女士飾物八達通這個龐大市場，兩年多前開始有了構思要生產一款內含八達通的首飾，還可以靈活地配搭成頸鏈、腰鏈、手鏈、匙扣、電話繩及掛飾，方便一眾貪靚的女士。「雖然當時已經有八達通手錶，但多是老人家和小朋友佩戴，但愛好名牌的OL就會嫌款式老套。」
有了目標，但因八達通的版權及技術上問題，在研發時並非如想像中容易，在物料上又諸多限制，金屬不能用，最後用了日本水晶膠，貪其顏色選擇多，又夠通透；背後的八達通號碼捨絲印而用雷射刻印，不易磨掉；太大唔得、球體又唔得。還要負擔起八達通的牌照費用，每件八達通掛飾的成本便提高了，一定要走高檔路線才能回本，每款賣$699至$799，所以在設計上要閃爆顯貴氣，選用Swarovski水晶石，貪其夠閃夠燦眼。店名LUMINEUX是法文，解作光明、燦爛的意思，正配合其首飾閃閃發光的意象。
開業4個月，已於本月初在銅鑼灣開設分店，Thomas預期，當初投資的七位數字，每款限量200個的首飾，已有8款賣斷市，可望於年底回本。幫襯的除了是本地的OL、闊太，還有日本、韓國、國內遊客，明知回國後冇得用也因為貪個款夠靚而大舉入貨，這是Thomas始料不及的。他還計劃於6月時，推出男士系列，物料上以皮革、設計上則以26個英文字母為主，以圖殺入男士市場。

LUMINEUX（28933633）　
地址：銅鑼灣景隆街2號B舖

八達通卡炒唔起

有傳八達通04年推出特別版是為了止蝕，以今年初推出的麥嘜麥兜紀念版為例，一套連電話繩及卡套賣$138，但八達通卡內只有$10面值，除非是擁躉，否則都會嫌貴不捧場。對於在好旺角商場2樓經營郵票及錢幣買賣的陳生來說，特別版八達通並未因此而帶來財富，「數量唔係多，放出來的和買的人也不多，一套特別版八達通，最多都是賺一兩成，有些較特別的如阿仙奴、HelloKitty才可以叫價特別高，但交投也不算活躍。」
另外，網上賣家David也說，特別版八達通也不是特別好賣，有些只能賺二、三十元，最好賣的就是HelloKitty於去年推出的「購物篇」及「親情篇」，共賣出五、六十套，毛利也接近四成，算是最好成績的一次，其他特別版還是一套起兩套止。

的士司機唔方便

八達通有成功亦有失敗例子，去年中新界的士率先採用八達通收費，當時20部的士試行，半年後已聽到的士司機怨聲載道，投訴要定時回粉嶺總公司「讀數」，逾期就會無效，有些司機大歎有時做不夠生意，還要老遠撲回公司交數，連油錢也蝕掉，故此索性不回。當時只剩下不足10部八達通的士在路面行駛。上月中，這些八達通的士更全面消失，黃的士負責人黃羽庭說，是一直等待新一代八達通收費器的到來，所以索性拆掉，等新貨到才重新安裝。「其實乘客的反應好好，輸入車資嘟一嘟就得。對司機來說，本來都好方便，又不用帶着大量現金在身，自身安全都有保障，亦不怕會收到假銀紙。但一星期要回公司讀數一次就不太方便。新一代的八達通收費器據說可以自動報數，又可以列印收據方便乘客，同時司機亦可以查閱當日的生意額，確實方便好多。」可是黃羽庭續說，本來這部新機於去年第四季面世，但等至現在還未有回音，可能還要等候那一連串的批文，市民要搭八達通的士還要加點耐性。