【動Fun】 女士扮靚招數層出不窮，尤其當光老化一詞出現後，令大部份女仔都唔敢同陽光玩遊戲！動主播Jasmine知道咗曬太陽會令女人易殘、變黃面婆、皺皮、仲會爆瘡之後，騎呢出現喺銅鑼灣。好在得靚女詩雅 （Michelle）打救，一齊去試吓新嘢！

詩雅皮膚白滑有光澤，佢話要keep得好係有原因：「開心皮膚就會好！」點解咁開心先？係咪有拖拍喇？有愛情滋潤？佢極具智慧咁回答：「呢份滋潤係源自屋企。加上我平時得閒會去跑下吓步。」咁就醒目地成功轉移話題，仲補多句護膚要對症下藥，所以就拉咗Jasmine去body check吓啲皮膚喇！

女人最鍾意比較，仲要用智能肌膚測試儀去比對，表層底層的皮膚問題統統表露無遺，但係詩雅對自己好有信心，即場試畀你睇！測試過後只不過發現皮膚有少少泛紅，就已經扁晒嘴喇！Jasmine趁機再問Michelle有關感情問題，佢自爆擇偶條件曾經要係單眼皮同高大，不過現時佢話：「只想搵一個心靈伴侶，能夠互相信任、互相理解，喺埋一齊感覺舒服就夠喇！」咦？睇嚟詩雅皮膚不老，心態老噃！

想知更多新奇趣聞，記得留意【動Fun】
http://hk.apple.nextmedia.com/livestream/channel/actionfun