截飛時間次次不同
球驗客手記:有心水買唔到遺恨

蘋果日報 2003/09/04 00:00


賭仔姓賴,我求大俠唔係姓賴,但係前晚上網賭馬會西班牙波,明明有心水都買唔到,結果眼白白睇住佢中,真係講起都有火。
等我解釋吓先,其實馬會一早講明咗,任何足智彩投注賽事都係開賽前十分鐘就會截止投注;不過我求大俠之前賭英超波,就試過好幾次去到開賽前一、兩分鐘,至喺網上幫襯佢哋嘅足智彩,重次次都成功落到注噃,重以為甚麼十分鐘前截飛只係得個講字!
點知前晚西甲聯,馬會又忽然揸得好正,真係同我玩「十分鐘前截飛」,等我一心諗住捧吓本報名家華度場,博番個維拉利爾和波,結果真係和咗派成三倍幾,但係今次就買唔到,真係「一殼眼淚」……

麥馬拿文又要做後備
由皇馬過檔曼城嘅麥馬拿文,周薪雖然由六萬五鎊減到三萬鎊,但佢諗住出場機會會多番啲,點知原來同以前一樣。事緣曼城領隊基瑾話佢哋中場太多人,唔知安排老麥踢咩嘢位。之但係,老麥喺曼城有科拿呢位老友陪佢,而且話晒都同聲同氣,日子應該比喺西班牙時好過。
韋斯咸小心揀領隊
𠵱家由臨時領隊布祿瓊領軍嘅韋斯咸日前就話,有五十人申請做佢哋領隊。但最搞笑嘅係,原來唔淨只有領隊經驗嘅人申請,連球員同做其他行業嘅人都有申請埋一份。我求大俠希望韋斯咸要謹慎選擇,萬一揀錯咗,幫唔到佢哋返英超之餘,分分鐘連累佢哋再降一級都唔定。

馬索尼邀艾迪亞出山
意大利傳嚟消息,博洛尼亞教練馬索尼準備出人情牌,請番今季離開羅馬嘅艾迪亞重返意甲發展。假如連呢個隱士都請得出山,就證明馬索尼呢個老牌教頭確實魅力非凡。艾迪亞講明就算加盟博洛尼亞,亦會喺合約上列明兩場對羅馬嘅聯賽唔會上陣,總算唔忘本。

川口能活轉會望好運
加盟樸茨茅夫兩年時間一直在球會呆坐後備席嘅日本門將川口能活,隨住捷克門神施歷錫來投,最終都轉會到其他球會發展,加盟丹麥球會北日德蘭,展開新一頁。其實,川口能活喺樸茨茅夫犧牲好大,無太多出場機會之餘,國家隊正選位置都無埋,今次轉投雖然唔係大球會,但總好過等運到!