彭家麗近年專注幕後工作，佢平時除咗四出登台𢱑銀外，重喺佐敦一個面積二百幾呎嘅單位經營唱歌學校。
彭家麗大前日喺佢間唱歌學校時話：「呢間學校開咗一排，我花費咗五位數字投資，當日為咗慳錢，我重自己落手落腳做裝修。」
被學生追求
問彭家麗教學生唱歌收幾多錢？佢話：「大約六百蚊一個鐘，最好笑係有個男學生話嚟學唱歌，但只係藉口，佢原來想約我食飯，我當然拒絕咗佢啦！」據知，彭家麗教唱歌，每月約有五位數字收入，喺𠵱家經濟低迷嘅市道，算喺咁上下。
黎瑞恩搬屋避狗仔隊
黎瑞恩最近成狗仔隊跟蹤目標，有某間傳媒用咗成個幾星期去跟蹤佢，搞到黎瑞恩好煩，由於佢擔心會影響屋企人，所以諗住搵地方搬，避開狗仔隊跟蹤。
馮仁昭估計，啲狗仔隊無非想睇吓黎瑞恩會唔會同男友曾智明準備結婚嘅嘢，事關有傳佢開完演唱會之後，會同男友拉埋天窗。
葉德嫻個唱擬加場
葉德嫻三月一號至三號舉行三場演唱會，𠵱家市道雖然差，但佢嗰三場嘅門票已經全部賣晒，而且馮仁昭重聽聞主辦單位正同葉德嫻傾緊加場㖭。相信久休復出嘅葉德嫻今次個唱，可算係近年反應最熱烈嘅一個。
另外，聽聞何超瓊都係葉德嫻嘅忠實fans，早排佢重訂咗三十張飛，諗住拉大隊捧場。
顧紀筠簽名換靚鞋
馮仁昭噚日喺華裔小姐嘅記者會撞到顧紀筠，顧老闆即刻捉住馮仁昭大呻一番，原來噚日有好多人打電話畀顧老闆，都係問係咪拎住佢即將開張嗰間鞋舖嘅請柬，就有鞋送。
嚇到顧老闆要即刻澄清話張請柬上要有佢簽名先有鞋送，所以話顧老闆簽個名都幾值錢㗎！
秦燕下周四設靈
曾經教過汪明荃、伍衞國同周潤發等人唱歌嘅秦燕老師，早前疑因腦癌病逝於廣華醫院，享年七十七歲。秦燕老師將會喺呢個月三十一號喺沙田寶福紀念館設靈，翌日下午一點出殯，相信屆時唔少秦老師嘅學生，都會到靈堂致祭，送秦老師最後一程。