新年伊始，恭祝大家身體健康，搵多啲。
隔晚美股唔生性，半日收爐市唔作得準，對港股未必有影響。不過港股就算點樣郁，暫時都好難喺窩輪市場搵食，因為可揀對象好少。
傳聞發新輪事件有進展，可能好快會百輪齊發，到時先至搵啲真正啱玩嘅對象，𠵱家暫時畀啲耐性等吓。
除夕夜，南華證券公司輪394，跌15%，由1.3仙退至1.1仙，有3球幾易手，銀碼4皮幾。經此一跌，394變成折讓率第2大嘅窩輪，4月夠鐘，負溢價9%，槓桿率12.1倍。單純睇數據，有得諗。買正股（619），要畀13.3仙，透過隻輪揸正股，成本12.1仙。不過為咗平少少做正股嘅持有人，未必着數，因為正股可能會跌落去（證券生意難做），而且冇乜交投，要綁住就冇乜謂。

2287睇撐得幾耐
聯想（992）近日回購，股價一級級上，直叩4字，見4個月高位。聯想唯一嘅認購輪2287，都撐得吓。不過估計唔會撐得太耐，始終36%溢價，會飛得去邊？如果睇好聯想，買正股好嘞。