美股有美股跌，港股有港股升。恒指成分股中，恒生（011）有「好息」基金搶貨，升1.50，升幅最大。恒生末期息2.80元，下禮拜一除息，年年例牌除息前搶息。
恒生升，帶動4件Call輪，升幅9%至12%。恒生輪成交唔多，甚至冇成交，唔啱炒。不如諗吓滙豐（005）。滙豐末期息2.26元，冇恒生咁多，但亦唔少，係下禮拜三除息，亦有搶息概念，昨升75仙，少過恒生，有機會由恒生帶動。
揀完正股揀輪，炒慣輪嘅都知，滙豐Call輪最活躍嘅係9030，數據差唔多最靚嘅亦係呢件。現價1.05元，溢價1.2%，槓桿率8.8倍。
電訊股有勢，中移動（941）升40仙，聯通（762）升10仙，和黃（013）亦有電訊概念，升50仙，升幅細過前面兩件。

9097靚多一靚
和黃會追番上去，揀和黃Call輪炒吓可也。9097昨日升得2%，數據靚多一靚，8月到期，現價1.02元，溢價3.1%，槓桿率6.8倍，就揀呢件。想波幅大啲，則揀9050或9110。