大球場噚日上演馬年賀歲盃，由東道主港聯決戰遠道而來嘅洪都拉斯，向來大波癮嘅阿董在場一邊睇波，一邊同記者講波經，大談如何帶出一隊出色球隊嘅心得，不過八方聽嚟聽去，覺得佢似乎語帶雙關，似講緊佢即將大舉推行的「部長制」多啲。
阿董話，打波最緊要幾樣嘢：信心、士氣、團隊精神，再加上幾個叻人。唔知佢係咪認為港英留低嘅官唔夠聽話、唔夠團結，又唔知佢心目中嘅叻人係邊幾位？
阿董意猶未盡，重引用一位成功美式足球領隊嘅話：“Winningisnoteverything,butistheonlything!（贏非一切，卻是唯一）”阿董喺美國生活多年，親身體會過美國人一定要贏嘅精神，怪唔得佢競選連任下屆特首時咁大口氣話：「有冇人同我爭，我都贏硬！」
講起踢波，阿董雞啄唔斷，話自己後生嗰陣踢中場跑來跑去；但一講到賭波，佢就投晒降，話冇心機填一格格密密麻麻嘅投注表，但聽落又唔多覺佢好抗拒賭波喎。
（圖）雖然東道主港隊最後輸波，但阿董都好開心咁同洪都拉斯代表握手。


E-mail：[email protected]