利物浦嘅英格蘭中場謝拉特係就係好波，但弊在無謂嘅小動作多兼茅咗啲，如果佢再係咁，真係擔心佢喺世界盃決賽周俾球證趕出場。
我求大俠前晚睇巴塞隆拿對利物浦呢場歐冠盃直播賽事，發現謝拉特傳射功夫到家外，原來重好識得「抽水」㖭。話說巴塞隆拿嘅李華度俾利記嘅球員踢到瞓咗喺度，企喺佢側邊嘅謝拉特就乘機抽水，一腳踢落佢個頭，之後重要扮晒冇嘢，問你死未？
雖話謝拉特嗰腳唔係太大力，而李華度亦未有向球證投訴，但係佢咁樣做好不智啫。如果一個唔好彩，俾啲嚴啲嘅球證見到，真係紅牌都有得佢攞，到時真係喊都無謂。
國際足協鼓吹公平競技，若果謝拉特佢再係咁，睇怕佢都好有機會喺本屆世界盃決賽周俾球證趕出場。

橙兵寸人反被湯臣寸
冇得踢世界盃決賽周嘅球員，原來係連講句嘢到唔得。事緣巴塞隆拿嘅法蘭迪保亞早排批評利記作客淨係識得死守，點知利記嘅臨時領隊湯臣就一句劈埋去，話今夏冇得去日本（踢世界盃）嘅人，冇資格批評佢哋。正所謂「勝者為王、敗者為寇」，鬼叫荷蘭唔爭氣無份打今屆世界盃決賽周咩，家陣俾人寸都係自己攞嚟！

伯金坐長途車腳軟
係人都知阿仙奴嘅荷蘭前鋒伯金怕坐飛機，但係佢為咗打下個禮拜三作客對祖雲達斯場歐冠盃，就決定以陸路去意大利。但係，我求大俠覺得就算佢去到都靈都幫唔到手，事關英格蘭同意大利都有一段距離，睇怕伯金坐十幾二十個鐘頭車後，成個人都散晒，重邊有力踢波喎！