當年今日

  陸恭蕙突然大動作 - 李八方

蘋果日報 2006/10/13 00:00


總部設喺紐約嘅人權組織「中國人權」宣布,香港嘅前立法會議員陸恭蕙,同哥倫比亞大學政治學教授黎安友,做咗佢哋理事會嘅共同主席。「中國人權」一向被中共視為顛覆組織,好似眼中釘咁唔拔走唔舒服,八方驚今次陸小姐做呢個位,唔知會唔會隨時連累埋陳四萬。
陸小姐係陳太政制核心小組嘅成員,佢今次做咗「中國人權」嘅阿頭,中國政府可能認為佢犯咗天條,以後連帶陳太做嘢講嘢都冇咁順,比以前惡搞。八方噚晚問陸小姐擔唔擔心做咗呢個主席會影響同中方關係,佢唔願多講,一味話nocomment。
八方同政界一啲朋友傾過,佢哋都話對陸小姐今次嘅舉動莫名其妙。
陸小姐六年前退出政壇後,創立咗思匯政策研究所,繼續倡導民主同人權,今年4月做埋證券交易所董事,今次佢突然咁激,唔知葫蘆裏面賣嘅係乜嘢藥嘞。