今年特首選舉完全無驚喜，由頭到尾只得一匹馬，但八方同啲老友傾偈時，卻聽聞官場𠵱家玩緊估領袖遊戲，個個官都坐晒喺度，靜觀其變。
官場中人講，早排等老董宣布連任，𠵱家就等新部長上場；所謂新官上任三把火，啲高官有乜重大政策推動或改變，老虎蟹都等埋個部長駕到至肯郁。無他嘅，𠵱家任何新政策，都好易搞到焦頭爛額，高官除非知道自己一定上到位，否則再坐一會，就可以退下火線，由新上任的部長嚟表演，何樂而不為。更何況新部長分分鐘要搞新猷，將現時所有舊政策全部推倒重來；高官屆時被迫自打嘴巴，會非常無癮，所以𠵱家以一招不變應萬變乃上上策。
近幾個月應該係啲官比較清閒嘅日子，但部長制一埋位，個個都要博表現，屆時啲官想唞吓都幾難。


E-mail：[email protected]