七歲男童岑浩賢日前遇伏被斬，引起全城關注，昨日警方迅速破案，拘捕涉案的賢仔繼母及行兇刀手共八人。不少關心賢仔的藝人均讚揚警方辦事能力佳，而曾到醫院探望賢仔的陳慧琳表示應為他作心理輔導，同行的車淑梅更透露賢仔的繼母不在探病名單上，又指從賢仔的言行中，可知他與繼母的關係十分疏離。

應為賢仔心理輔導

陳慧琳：無論乜嘢問題都應該和平解決，唔好用暴力。𠵱家係咪應該搵社工去幫賢仔做吓心理輔導呢？屋企發生啲咁嘅事，可能會令佢以後唔再信人，所以要有適當嘅心理輔導，等佢可以喺健康環境下成長。
之前我本來想去探多次賢仔，但佢成日要幫警察落口供，醫院又好多記者，我唔想咁高調，所以未去。賢仔之前同我講，想睇故事書同鍾意高達，雷頌德送咗啲高達玩具畀佢，我都買咗啲高達嘅書，想過幾日再去探佢，但探佢要得家人同意，我呢幾日都未搵到佢老竇呀。

主謀衝動害人害己

車淑梅：呢件事真係天地不容，喺今日呢個開學嘅日子，可以聽到一個咁好嘅消息真係令人好振奮，今次警方當然好有效率，亦係因為全港嘅市民都一條心想為賢仔搵出兇徒，大家群策群力。今次警方破到案，可以畀香港市民知道，香港依然係一個好安全嘅地方，如果你做咗犯法嘅事，一定係難逃法網。
至於賢仔個繼母被捕，我又唔係覺得好震驚，因為當日我去探賢仔時，知道入病房探佢嘅家屬名單只有四個，但係冇佢繼母份。同埋我問過賢仔最錫邊個時，佢順序話係嫲嫲、爸爸、伯父、契媽同埋親生媽媽。
而Kelly問賢仔平時邊個陪佢睇電視時，佢就話爸爸同伯父好多時都會陪佢睇卡通片，由呢啲對話都可以感受到佢同繼母嘅關係比較疏離。計劃呢件事嘅人太年輕、衝動，佢哋以為用暴力就可以解決到問題，或者發洩到自己嘅不滿，但係最後傷害到人之餘亦都害到自己，其實所有嘢都應該用和平手法去解決。

呼籲父母謹言慎行

劉德華：我唔知案件詳情，但如果賢仔嘅家庭環境真係咁複雜嘅話，之前社會熱心大眾嘅捐款，係咪應該小心處理呢？大家都係想幫個小朋友，唔好辜負同白費熱心人士嘅心意。我希望大家幫到賢仔健康成長之餘，其實社會上可能重有好多生長喺問題家庭嘅兒童，都好值得大家同政府去關心同正視，大人做嘢要謹言慎行，唔好影響下一代。

盼同類事件勿重現

黎明：今次警方可以咁快拉到涉案嘅人，證明咗香港市民好齊心，所以聽到呢個消息時真係好鼓舞。至於賢仔方面，我好希望佢可以盡快忘記唔開心嘅事，亦希望社會上對佢多啲支持，最重要係之後唔好再發生同類事件。

寄語賢仔樂觀做人

雷頌德：聽到話咁快破案都好開心，希望賢仔樂觀做人，努力向前，我想話佢知，其實呢個世界壞人好少㗎咋，佢已經遇晒佢呢世要遇嘅壞人，如果時間許可，我會去探佢嘅。

擔心善款落他人手

曾志偉：其實件事都有先兆，好多熱心人捐錢幫賢仔本來係好事，但要留意啲錢唔好落入唔知乜人手上，否則件事就好有問題。
希望熱心人士繼續幫佢，但個基金要點安排啲錢先真正幫到佢呢？

大人事不應累細路

梁詠琪：件案我唔想評論，大人事最好由大人處理，希望事情唔會影響到賢仔，我就好想賢仔快啲康復。
而方力申則指破案是天大喜訊，希望賢仔不要留下陰影，日後可以開開心心，樂觀做人，又表示相信壞人必會有報應。

案件發展出人意表

楊千嬅：事情發展真係出人意表，我真係唔敢想像會有繼母被捕咁嘅事情發生，唔理件事點發展都好，我只係關心賢仔將來的生活和成長環境，睇吓社會可以點幫佢。