手上的工作暫時告一段落，係時候好好整理一下自己荒廢已久的身體。首先就唔理係咪飲嘉士伯都先飛個靚髮，起碼睇落似番個人，跟住就逐樣執，邊度唔妥整邊度。
棚牙經已痛咗好耐，尤其係飲冰水時，赤赤痛。一向有定期檢查牙齒的習慣，按理應該唔會有咩大問題，點知傳來噩耗，其中一隻大牙經已補無可補，一係就剝咗佢，一係就「杜牙根」。「杜牙根」基本上係一項手術，需先將牙鑽空，然後將牙的神經取出，再將呢隻有軀殼冇靈魂嘅牙用訂做嘅牙冠套住，保護住呢隻名義上已死去嘅牙齒。
冇理由後生細仔會想冇咗隻牙，講嘢好似漏氣風爐一樣；更冇可能剝咗隻牙再鑲番隻金牙，於是決定杜牙根。唔明白點解科學已經咁昌明，車牙時發出的高頻聲響仍係咁恐怖，最得人驚係牙醫用工具將牙又掹又撬時發出的金屬撞擊聲，聽到膝頭哥都軟晒。
牙醫經已好好手勢，對我冇造成不必要嘅痛苦，但個口擘到湯碗咁大足足半個幾鐘頭，點都唔係一件令人愉快嘅事，我卻有本事瞓着覺，一擘大眼時手術已差不多完事，護士雖然有個口罩遮住塊面，但都睇得出忍唔住笑。
從此，有一屍體躺在我的口腔內，有一部分的身體已壞死，先我而去，為此感慨良多，更令人感慨的是，牙痛雖已暫時擺平，但埋單時，肉之赤痛油然而生，赤赤痛，至今未散。