立法會因為要三讀一條證券大法，搞到前晚開唔完會，噚日朝早繼續。復會後首先辯論卿姐的直選特首動議，一拗拗到中午十二點，到陳國強的第二個辯論，會議廳內走剩的議員已經冇幾多個。
八方睇住時間慢慢咁過，議員慢慢咁走，到煲呔曾做回應的時候，即下午一點四十分，坐喺度的議員只有十八個，如果有人呢個時候唔生性，叫主席數一數法定人數（三十人），成個會都開唔成！
煲呔見到咁嘅情況，忍唔住要窒吓尊貴議員；佢話面對呢個幾乎空無一人的會議廳，佢應該感到安慰。點解？「因為咁反映大部分尊貴議員都認為，佢哋午膳如果受到阻延嘅結果，會比佢哋指政府效率出現問題更加嚴重！」唉，邊個叫班議員一邊鬧政府冇效率，一邊走去食飯走得咁高效率吖！
（圖）煲呔曾一向快人快語，今次竟然兜個圈去窒班立會議員。


E-mail：[email protected]