行貨姆明精品搶閘曝光
有芬蘭國寶之稱，紅遍港、日、台嘅姆明（小肥肥一族），一直備受廣大少女歡迎，無論係姆明、科妮、史力奇抑或係樹精，只要一有精品推出，就一定俾人狂掃兼大炒特炒。唔少Fans都話原著嘅漫畫，遲遲都冇香港中文版推出，等到頸都長。好彩預計喺3月28日會有張小嫻繙譯嘅香港中文版推出，最正係有埋香港代理嘅精品，佢哋貨源充足，從此唔使捱貴貨。頭一炮推出嘅姆明、科妮搪膠公仔，就連日本都未有，絕對矚目。
記者：張穎倫 攝影：陳盛臣
9吋搪膠 日本都未有
今期搪膠公仔絕對係玩具、潮流界熱賣產物，呢次雖然唔係由EricSo、鐵人兄弟等Figure紅人操刀，但單係姆明同科妮嘅威力，已令人引頸以待。事關呢隻9吋搪膠連日本都未有，而且由玩具生產商威龍負責嘅造型亦相當唔錯，一拎上手就發覺質感好好，佢哋嘅大肚腩同眼光光嘅形象，更做得非常神似。據聞遲啲更會推出史力奇同阿美搪膠，要儲齊一套就必定要快手。
每隻售價：$250（環球）
＊預計3月28日有售
新輯漫畫 香港獨有
由芬蘭漫畫大師ToveJannson創作嘅姆明漫畫，全套共有12冊，每冊皆由多篇短篇漫畫組成。由於是首次登陸香港，漫畫會重新輯錄，第一冊名為《我要戀愛》，由張小嫻揀選姆明谷入面各戀人間嘅故事，夠晒特別，全世界只得香港獨有。最厲害係除咗會有平裝版同硬皮精裝版外，更有搪膠漫畫特別版，有齊硬皮漫畫同特別色搪膠公仔，升值潛力極高。
普通版：$38（三聯）
精裝版：$50（三聯）
搪膠特別版：售價未定（環球）
＊預計3月28日有售
芬蘭航空 姆明飛機
之前比卡超出過嘅全日空飛機模型，大受動畫迷、飛機迷歡迎，一出就俾人掃晒，就算比卡超Out咗，模型都一樣咁掂。今次輪到芬蘭航空嘅姆明家族飛機，機款跟足真飛機，都係DC-10型號，採用1:400比例，由機身圖案、引擎到起落架都一絲不苟。再加上姆明呢個長青標誌，首批貨一定會搶手。
實用文具
Fans必儲原子筆
眾多姆明產品之中，一向都係原子筆最多人儲，因為每款筆都會由一個角色擔正，而且價錢唔算太貴。今次加埋港版重新設計、製造，頭炮以最受歡迎嘅姆明同史力奇擔大旗，外觀夠晒討好，更會以禮盒包裝。
每支售價：$49（商務）
＊預計4月尾有售
筆記簿封面勁靚
有留意開姆明精品嘅朋友，可能都會知道，佢嘅筆記簿封面好多時都設計得非常簡單，內頁重靚過封面，搞到個個唔捨得用。不過今次就將封面變得多姿多采，人物夠晒大堆頭，不論買嚟送畀小朋友抑或買嚟自己儲都咁正。
每本售價：$5（三聯）
潮流之選 4R相簿
呢一、兩年，4R照片已經有取代3R之勢，所以麥兜早前出嘅4R相簿大賣特賣。今次輪到姆明推出，設計更上一層樓，除咗封面顏色夠晒鮮豔外，內頁更送埋記事貼紙同3R相框，畀你可以放番以前嘅舊相。數最有心思，絕對係相簿封面，採用換相設計，等你可以隨時隨地換上自己嘅照片做封面。
隨身日用品
人人啱用八達通套
專為香港Fans設計嘅八達通套，尺寸絕對啱啱好，虛位極少唔怕跌咗張卡。揀選嘅構圖亦相當唔錯，現時有三款畀你揀，小記認為最受歡迎的必定係史力奇釣魚Look，咁靚帶住佢搭車真係夠晒威！
每款售價：$6（三聯）
(C)MOOMINCHARACTERSTM
LicensedbyMedialinkAnimationInternationalLimited
上班證件套
唔少上班族都興用證件套袋住職員證，貪佢掛喺頸夠方便，就算喺公司行嚟行去都唔怕！但一般嘅淨色套確係悶到抽筋。如果換上呢四款姆明證件套就醒神得多，就算放工重帶住張證都唔覺瘀。
每款售價：$19（三聯）
店舖資料
環球模型（25775950）
銅鑼灣皇室堡2樓H舖
三聯書店（24705228）
元朗教育路千色廣場2樓1號舖
商務印書館（28908028）
銅鑼灣怡和街9號