翁虹傷後復出，身形喼得重正過以前，雖然佢同未婚夫迫田正己定咗婚，但一直都有其他追求者。
愛自吹自擂
馮仁昭早排聽到出面傳黃夏蕙個仔Nelson追緊翁虹，本來呢樣嘢一啲都唔出奇，但最近聽到Nelson周圍同人炫耀，話翁虹已經係佢女朋友，馮仁昭就覺得好奇怪，因為係人都知翁虹已經係半個日本婆，而且佢同男友嘅感情又好穩定，所以覺得可信程度非常低，再加上呢個Nelson平日都鍾意自吹自擂，好似佢同人講話自己係某車行嘅老細，但原來只係夥計，所以佢同翁虹拍拖呢單嘢，馮仁昭都只係當笑話嚟聽。
聞言笑不停
不過馮仁昭循例都有打電話畀翁虹求證，佢聽完呢件事後，喺電話不停咁笑，馮仁昭問佢有乜嘢回應，佢話：「唔係事實嘅嘢，我覺得用半秒鐘去回答，都係嘥緊你同我嘅時間。」
林嘉欣尷尬吻學友
憑《男人四十》獲提名金獎像「最佳女配角」及「最佳新演員」嘅林嘉欣，噚日接受商台《茶煲裏的查篤撑》訪問。林嘉欣話其實已經識咗學友幾年，無論喺戲入面定係現實生活，學友都係佢嘅偶像。
林嘉欣話同學友拍接吻戲時，覺得好尷尬，拍嗰陣個心重跳得好快，好緊張。
王喜剖析羅兆輝
王喜噚日喺商台為《茶煲裏的查篤撑》擔任客席主持，阿喜喺節目中講到近期嘅羅兆輝事件，佢話喺呢件事度得到一個啟發，王喜話：「就係毒品害人，佢清醒嘅時候就會捍衞佢個仔嘅私隱，但係佢神志不清時會覺得其他人嘅私隱係其次，所以可以睇到服用藥物之前同之後嘅分別。」
鄧健泓盼做有型殭屍
鄧健泓噚日接受港台《娛樂滿天星》訪問，佢前日推出咗第二張個人大碟，佢話今次嘅心情係驚多過緊張，因為怕成績唔及上次好。問到佢最想做乜嘢角色，佢竟然話想做殭屍，好似電視劇《我和殭屍有個約會》入面，有型有款嗰種喎。
雪梨男友被同事嘲笑
早前有報道話雪梨個男友係風流武師，重搞到雪梨受感情困擾而情緒失控。馮仁昭收到風，雪梨個男友俾無綫啲幕後笑到面黃，因為佢個花名叫「發瘋」，聽個名就知唔係乜嘢靚仔，重係打扮得爛撻撻嗰隻。無綫台前幕後啲人，都話佢男友橫睇豎睇都冇乜條件風流喎。
尹光個唱銷情不俗
尹光將會喺今個月二十五號開始，喺尖沙嘴文化中心舉行四場演唱會。今次尹光會請全女班做表演嘉賓，包括方伊琪。
尹光噚日喺佐敦錄音室進行第一次排練，佢話：「今次啲飛已經去咗七成幾，而我今次嘅歌酬都有六位數字㗎。」