剛剛收完富商李嘉誠捐款嘅中文大學，校長劉遵義唔知係咪開心過頭，噚日主持開學禮時，向住啱啱入學嘅二千幾名新生，不斷標榜中大嘅成績點好，又列咗中大同其他四間唔開名嘅院校比較，誇讚中大係會考、高考中，全港成績最高，又係最多人揀選為第一志願嘅大學。
佢重硬銷學生點勁，講吓中大有四個高考5A狀元，十四個會考10A或9A狀元。講完本地生點勁，劉校長轉而大讚啲內地生，又話收咗個福建省全省第二名嘅學生，佢差一分就攞到全省第一喎！就咁聽，重以為係連鎖補習社賣廣告㖭。唔怪得有小學校長埋怨，香港𠵱家辦學，校長好似做咗行政總裁咁。
心情靚爆嘅劉校長，講完一大輪威水嘢，重走落台同啲學生影吓相、傾吓偈，認真識做。

傳真︰2623-9278
電郵︰[email protected]