當年今日

男友凌晨速遞白玫瑰
馮仁昭四圍超:滕麗名28歲牛一唔敢喊

蘋果日報 2003/01/21 00:00


滕麗名噚日二十八歲牛一,前晚佢同蔡少芬(Ada)喺九龍灣拍無綫新劇《陀槍師姐IV》,滕麗名男友魏駿傑為咗畀女友驚喜,特別喺噚日凌晨時分揸住部三菱Pajero到拍攝現場,速遞一束白玫瑰同蛋糕畀滕麗名,壽星女見到即時感動到眼濕濕。

巧遇真警員
魏駿傑本來都要拍《陀槍師姐IV》,但因為張慧儀之前整傷頸骨取消通告,於是佢就可以幫女友慶祝生日。魏駿傑除咗送禮物之外,重即場向滕麗名獻吻,搞到佢好感動。壽星女滕麗名話:「估唔到佢咁鬼馬,生日願望怕講咗出嚟唔靈!」滕麗名話雖然好感動,但點都會忍住唔敢喊,事關怕俾人笑足一世喎。
此外,滕麗名同Ada前晚着住整齊交通警制服拍劇,咁啱有正牌警員路過,佢哋重問工作人員拍攝有冇申請㖭!

安仔教Sammi西環買衫
許志安噚日去銅鑼灣出席「麥當勞新年開心成雙」活動。提到之前鄭秀文同古天樂一齊俾人影到喺中環買衫,安仔話:「咁以後唔好去中環,去西環就一定冇人撞到。」問安仔係咪覺得呢啲緋聞係為咗宣傳新片?佢話:「我冇講呀!」
朱孝天生日食自己
上周三係朱孝天嘅二十四歲生日,佢前日喺新加坡宣傳《流星花園II》,順便同fans補祝生日。問朱孝天生日點樣度過?佢話:「當天我特別要求不要工作,讓我安靜的慶祝生日。」
原來當日朱孝天特別去超級市場買餸,親自下廚煮嘢畀自己食,佢重話將來打算開餐廳喎。

阿Yu:粗口係文化
趙頌茹(阿Yu)噚日接受港台訪問,佢隻新碟第二次版噚日出街,佢話:「每次出碟我都會病,今日我又感冒。」阿Yu嘅新碟第二次版歌詞有粗口,佢解釋話:「Edison(陳冠希)作嘅《唔該行開》入面有英文粗口,不過我唔擔心銷量,呢啲只係外國嘅街頭文化。」

AV女優鬧市派底褲
日本AV女優七瀨里帆同坂下麻衣,噚日喺尖沙嘴宣傳《成人特區-東瀛架步》節目,向市民派發女裝內褲同「我最喜愛AV女優」表格,問兩人最欣賞自己身體邊一部份,里帆就指住個胸,至於麻衣就覺得自己對眼最靚,佢重話:「我嘅目標係拍香港電影。」
empty
咁鬼馬嘅?
empty
正牌警員(左一)到場調查,冒牌師姐蔡少芬(右二)重搞搞震。
empty
許志安(右二)
empty
趙頌茹
empty
七瀨里帆(左)、坂下麻衣(右)