無綫前藝員、中印混血兒雪兒，早年憑住同郭富城合作嘅「自由2」廣告竄紅，跟住佢又同古天樂合作拍電影《爆裂刑警》同無綫劇集《尋秦記》而傳緋聞。
去年七月，雪兒嘅台灣經理人錢幽蘭入稟台灣法院，指雪兒擅自喺香港接拍XS服裝廣告，要求對方賠償約一百二十萬港元，而雪兒亦反控經理人帳目混亂。
提早解約
雪兒同錢幽蘭對簿公堂，總共已開咗五次庭，呢單案終於有結果。雪兒日前親自去咗台灣向經理人錢幽蘭道歉，雙方達成庭外和解，雪兒亦答應畀番合理賠償，大家提早解約，而雪兒就可以回復自由身。
羅慧娟主持《大搜查》感充實
羅慧娟自從上個禮拜主持無綫《全線大搜查》之後，佢話覺得成個人都充實咗，雖然上個禮拜佢只係主持咗兩晚，但娟妹話《全》節目上個禮拜平均收視有二十點，覺得都唔錯，佢重講笑話：「我唔會話有幾多點就着泳衣㗎！不過希望多啲人去批評下，畀啲意見，我自己會盡量做好啲。」
許秋怡否認患乳癌
許秋怡噚日陪男友王書麒去荃灣有線錄影《娛樂熱賣友唱友跳》。對於早前生乳癌嘅報道，秋怡話得啖笑。秋怡笑話：「其實嗰日我係同個記者傾偈，冇諗過佢會寫，不過我都唔會怪佢。我只係想講我冇生乜嘢乳癌。幾年前，我左邊嘅胸生咗一粒瘤，係良性，並唔係癌。之後我咪做咗個手術切咗佢囉，我唔想攞器官嚟做宣傳。」
盧希萊車行開幕
盧希萊夫婦同朋友喺元朗開嘅車行，噚日正式開幕，佢哋帶埋個女嚟。老友林韋辰、吳岱融、陳明君同八両金都有嚟捧場。盧希萊重請大家食盆菜，盧希萊話：「我哋都係打份工，我最希望老公生意好，BB又快高長大。」
白韻琴見記者即走
白韻琴前晚同男友阿Paul謝偉俊一齊出現喺灣仔君悅酒店，唔知白姐姐係咪想同阿Paul好好咁享受一餐燭光晚餐，點知咁啱有成班記者喺度，白姐姐一見到有咁多記者，竟然一反平日友善態度，十問九唔應之外，重即刻拉埋阿Paul一齊坐的士走。