恒指再微跌35點，滙豐（005）跑贏大市，有半元進帳，收87.25元，但對唯一嘅認購輪1735冇幫助。
1735收1.2仙，跌29%，而且做咗跌輪榜上阿一。
隻輪昨日最低1仙，呢個「最低價格」隨時再現。下月5日最後交易，得9日命仔，行使價102.1元，滙豐有乜機會9日內升15元？
滙豐另1隻輪1739，成交金額近千六萬銀，排第一，呢隻係Put輪，收56仙，跌8.2%。下月初最後買賣，溢價0.5%，槓桿率15.6倍，對正股變化反應好敏感。正股郁2元，隻輪隨時上落30%。
滙豐定得住，有機會上移些少，1739博唔過。
中移動（941）收22.10元，唔見50仙。呢頭講緊認購輪1715難免作廢，嗰頭隻輪升25%，做咗是日輪王。

1715死撐冇用
1715下月到期，行使價34.2元，溢價56%。
隻輪點解會升，皆因輪價細，得2仙，細細注買賣已經可以將輪價嚟郁。睇住嚟，死撐冇用，撐唔得幾耐。