好運馬主 - 左丁山

蘋果日報 2015/05/16 05:20

l012GG細語左丁山步步友金融時報

馬主N來電約食飯,講明由馬主Y請客,地點就係威靈頓街74號。呢度有間乜嘢餐廳,馬主N開古,就係左丁山提過嘅「大官廳」,哦,好易去啫,呢間新開張嘅食肆大概還是冇乜人識,唔駛預訂,行入去就有位,不過馬主Y原來與「大官廳」幕後老闆好熟,一齊養馬嘅㖭,就係兩隻惡馬「文藝復興」與「點解」吖嘛。故此一行入去,特別好招呼,馬主Y已經訂好枱等候。
馬主Y非常好馬運,前季有隻馬本來要上機運嚟香港,點知上機前有小意外,要留在澳洲養傷,為趕「死線」,急忙另購一隻PPG自購新馬頂上,由馬主N介紹,穿針引線,以十分廉宜價錢買入一隻外貌不揚,一位本地練馬師一睇就唔鍾意嘅Towkay馬仔,來港之後擺入一個外籍練馬師馬房,呢位練馬師一見隻馬就唔開胃,話隻馬冇潛質,又細隻兼輕磅(只得九百幾磅),跑咗一兩場就叫馬主Y將隻馬退役,買過另一匹高價馬替補。馬主Y唔肯,季末就轉倉,轉到練馬師S個倉,哈,居然如神話故事,由上季至今,隻馬連出十一場都收獎金,贏咗四場頭馬,總獎金已過二百三十萬元,跑沙田得、跑快活谷1650米更掂,已經升到上第三班。養馬唔係個個有資格有運氣養到一隻「步步友」嘅,普通馬主如馬主Y咁已經好運到極,全家開心。
馬主Y隻馬今季變成咗係馬會提款機,出親都有支票收,故此日雖只三人吃午飯,還是吃齊「大官廳」推介名菜木瓜雪蛤炖湯、焗蟹蓋、匈牙利黑毛豬叉燒、鵝肝片皮鴨,甜品係沖繩黑糖薑茶湯丸,除片皮鴨外,味味精彩。
食得咁飽,飯後特登行一個大圈,搵路行,行經大道中過咗Zara見到一個大招牌Intimissimi,係乜嘢產品呢?即刻醒起5月10日之「金融時報」Lunch with FT,係訪問呢隻牌子嘅大老闆。老闆叫做Sandro Veronesi意大利維羅娜市人,今年55歲,福布斯富豪榜指佢有20億美元身家。佢在1984年搵到第一份工,負責賣女人絲襪,後來自立門戶,成立Calzedonia,由小開始,一路擴張至成為2014年營業額達到18億美元嘅絲襪、棉襪、泳衣、女士內衣嘅大集團,Intimissimi就係旗下牌子之一。生意做到咁大,咪好唔得閒?非也,Veronesi對FT講,佢每日工作8小時,每星期工作5天,放假放到足,佢嘅集團僱員之中,84%係女士,59%年紀低於30歲。點解請咁多女士?有兩大理由,Veronesi先生話,男人老咗,一係變得更聰明,一係變得更笨,女士有更大能量(energy),其次佢嘅集團專售女士產品,女士更加明白市場需要!