醫管局出現財政赤字，私家醫生乘機指摘楊永強。立法會嘅醫生代表勞永樂自然係主將，佢哋嘅言詞經報紙報道，帶有火藥味，不過勞議員同醫管局都話傳媒曲解佢哋嘅意思喎！有一啲公眾人物每每借傳媒發難，有的放矢，之後就話記者曲解，未免醒目得太過。
究竟私家醫生對醫管局有冇怨憤呢？冇就假嘅。一位自稱市民嘅《城市論壇》現場觀眾，揸咪發言時大罵楊永強係二世祖，言辭激烈，一睇就知此君滿腔憤怨，佢鬧得㷫之時，台上嘅醫管局專業及公共事務總監立即指出嗰位觀眾係私家醫生，醫生借電視節目發洩不滿，有備而來，可見平時已經非常𤷪𤺧。
中大商學院辦醫療MBA，畀醫生同護理人員讀，據講好受歡迎。一位醫科教授對左丁山講：「醫管局管理層經常以管理概念、資源增值為名，好似蝦啲醫生唔識管理學，所以大家去讀個MBA學位返嚟，以後識得同管理層辯論一啲管理與財政問題。」
醫生讀埋MBA，醫管局高層肯定更加頭痛。教授話鍾士元成立醫管局之初，誠懇咁希望為香港提供優良醫療服務，楊永強亦有赤子之心，但係公共醫療唔係靠純真純情，產品做到好，價錢收到平而成本不減，結果會係點？如果係一盤生意就立即執笠，係公共服務就要向納稅人伸大手板，若兩者皆不是，就要削減成本，睇嚟啲公共醫生及護理人員要有心理準備。