本周最震人心弦的新聞不是阿蟲用震音羅文腔高歌《獅子山下》，而係一則不起眼的爆竊消息。爆竊現場是中環商廈，警方憑天台安裝的高空監控儀發現竊賊在商廈外的棚架活動，馬上拉隊捉人，飛天蠄蟧原來是68歲的老翁。本報指老翁有同類案底，有糖尿及老人病。
年近七旬，搵食不畏高、不怕黑。阿伯沒有吊威吔，不是扮成龍，不是夥拍荷李活巨星羅拔迪尼路拍《Score極度爆破》續集。有頭髮冇人想做瘌痢。阿伯如果有七百幾條自己友，一擲八百幾萬裝身推舉，急市民所急，諗市民所諗，眾人反對我扮醒之下，阿伯肯定樂於接棒；領導特區，並且公開承諾，治港只許成功，不許失敗。阿伯如果朝朝六點耍太極，七點鐘準時到政府總部坐鎮，就不會身痕，癲到晚晚帶住螺絲批做空中飛人。
冒險爆格的背後，可能另有蹊蹺。阿伯一心想做部長，為社會獻身，甚至自願減薪。但公僕要大瘦身，68歲阿伯想入職都幾難。阿伯唔係姓董，想任勞任怨、愛國愛港嗎？連個門兒都沒有！
令人感歎的是，同是有糖尿與老人病的其他阿伯，身上掛住尿袋跟人大代表與政協的獎狀，出入中南海聖地，對記者厲聲訓斥，對國事亂咁指點，出洋相當做出風頭。同遮唔同柄，香港被這批政治小圈子老人幫玩下去，很快會玩殘。到我們68歲，臨老唔過得世，恐怕只有做賊自救一途。未雨綢繆，老友，係時候食少兩餐，勤練交叉手掌上壓至得。