1911年國父孫中山發動辛亥革命成功推翻滿清，每每提起呢件史實，香港人都與有榮焉，因為孫中山喺香港讀書，更將呢個南方小島視為反清重要基地。今年係辛亥百周年，香港各界少不免大事慶祝一番，好似建制派噚日就搞咗個辛亥革命百周年大會，仲搵埋中山先生個曾姪孫大談「曾叔祖父」嘅威水史，大會又播出由全國政協主席賈慶林建議開拍、中港巨星傾力演出嘅《辛亥革命》預告片。
另一邊廂，支聯會下個月9號喺尖沙嘴文化中心搞辛亥革命展覽，到時仲會有話劇，雖然比唔上建制派大堆頭製作，但勝在高舉三民主義，倡議建設真正民主中國，唔似得建制派一味sell強國崛起。