中環在線:黎大鈞「數碼通加人工」 - 李華華

蘋果日報 2008/12/19 00:00


裁員之聲滾滾來,但數碼通(315)阿媽新地(016)上個月講明,唔單止冇計劃裁員,仲會繼續派發花紅同雙糧;個仔數記就更加進取,打算明年會加人工㖭,不過CEO黎大鈞都好坦白,話加就唔會加好多,但至少追得到通脹。華華相信班夥計聽到都安樂晒,希望其他企業有樣學樣啦。
金融海嘯襲港,企業開始緊縮開支,出差傾生意自然可免則免,黎大鈞話,好明顯睇到打去海外,同埋手機漫遊通話量少咗,咪話對電訊公司生意冇影響。講番數記,公司往年喺會展搞周年晚會,今年就由各部門自己搞番,按人頭計每人畀幾嚿水,但要實報實銷,即係唔去就冇得攞。佢話一來慳唔少錢,二來圍內玩開心啲。
數口雖然精,但應使則使,數記噚日同愛立信宣佈推行全球首項MIMO先導計劃,簡單講即係用呢項技術提升傳輸速度同容量,不過𠵱家啲手機未必支援到新服務,即係話大家又要畀錢換機先得囉!