唐唐為迪士尼周圍飛 - 李八方

蘋果日報 2005/05/20 00:00


煲呔即將辭職不幹去選特首,一早已經講咗話唔會同煲呔爭嘅財政司司長唐英年已做好接棒準備,由煲呔宣布辭政務司司長之日起,接掌署理特首一職。
𠵱家其實時日無多,但係唐唐重要外出,真係非常緊湊。八方聽聞唐唐喺呢個星期日晚,會率領旅發局、旅遊事務專員以及業界人士去北京同廣州推廣迪士尼樂園,唐唐一早預咗去,所以唔會改期。
唐唐佢哋周一喺北京搞場午宴,周二飛去廣州,周三喺廣州又一樣開場午餐會,連夜就趕返香港,抵港時候,立法會可能剛好通過特首補選條例修訂草案,規定新的特首任期為兩年。
唐唐周三晚唞唞,周四就周身唔得閒,因為按照劇本,煲呔是日(五月二十六日)會向北京請辭,亦同時宣布有意競逐補選,唐唐真係要好好珍惜呢一段美好時光,過足特首癮,因為煲呔肯定有排玩。

傳真︰2623-9278
電郵︰[email protected]