李國祥(KC)一連三場嘅《Share With You》慈善演唱會，噚晚喺旺角麥花臣場館舉行頭場，今次KC同教育機構合作，安排咗四十位年齡由十歲至廿一歲嘅學生，以戲劇、舞蹈同唱歌向觀眾演繹KC由小孩開始，到o依家出道咁多年嘅故事，包括經歷事業低潮，及曾因炒樓致破產的往事同觀眾分享，仲邀得漢洋同蘇珊擔任嘉賓。

完騷後KC接受訪問時，覺得今日第一場表現應該可以再好啲：「今次演出經方法同以往好唔同，入面有好多戲劇亦都有好多嘢要記，所以覺得自己仍然有啲瑕疵，但係相信跟住嗰兩場會越做越好。」演唱會中段KC提起爸爸一早離世，剩低媽媽獨力照顧家庭，一度感觸落淚，佢話：「真係唔好意思，綵排嘅時都無事，但一到正式就忍唔住，媽媽對我真係好重要。」

講到今次同一班學生友合作，KC覺得大家相處得唔錯：「佢哋表演得好好，有時我唔記得歌詞、或者唱錯咗，佢哋都會提番我，要求好嚴格。」問到姪仔Alvin今日有冇嚟捧場？佢話：「Alvin呢兩日都要返學，留番尾場先叫佢嚟，佢喺度我會好緊張，所以等呢兩場做好啲先叫佢嚟。」

精選娛聞，喺晒《娛果》
http://fb.com/appledailyent