專注發展時裝雜誌事業的徐濠縈，下周四（二十八日）起一連五天，將於銅鑼灣京士頓街家居廣場再次賣二手衫，她年半前已辦過，她日前說：「今次有啲唔同，係由D-mop賣過季衫，不過會有一個地方畀我賣歌手朋友嘅二手衫。因為之前忙搞雜誌，我又覺得香港四季天氣唔係咁分明，賣二手衫又唔使搞得咁密，咪隔咁耐先再搞。
一腳踢做阿四
「其實搞一次二手衫真係好困身，每一件收番嚟嘅衫都經我親手整理過。由收衫到定價錢都一腳踢，我好似做阿四咁，成日揸住車、拎住紅白藍膠袋去收衫。」
今次有份拿出二手衫寄賣的，除了徐濠縈的男友陳奕迅，還包括鄭秀文、謝霆鋒、舒淇、何超儀、梁詠琪、Twins、張柏芝和盧巧音等。其中，舒淇去年在法國欣賞時裝展時穿着的Celine黑白格仔大衣，原價約八千元，現只售一千二百元。
主打年輕歌手
此外，賣二手衫和出版雜誌相比，徐濠縈表示兩者大不同，她說：「賣明星二手衫成本好低，但係唔會賺大錢，不過好過自己搞舖頭，因為好困身。啲朋友成日都有打電話畀我，叫我去攞衫，其實咁做都好環保呀。」至於多了人加入賣名人二手衫行列，徐濠縈認為各有各做。