今屆收費台播世界盃，係九展打躉，一味玩大堆頭，有咁熱鬧得咁熱鬧，算係幾有氣氛；不過對於一啲直播安排，我求大俠個人認為實在沒有照顧到電視機旁，每個月畀咗二、三百蚊嗰千千萬萬用戶嘅感受。
之前我哋曾彈過佢哋啲東西看台、精華台同戰術台實在多此一舉，今次想批評吓佢哋直播場次嘅鏡頭安排。其實好多人同我求大俠一樣，想睇多啲半場同完場時候，啲球員離場時嘅悲喜神情，同隊友擁抱或者走向場邊同球迷慶祝嘅激動一刻；不過今屆收費台播世界盃幾乎完全刪減呢類鏡頭。
好似前晚場英阿大戰，完場後，好多觀眾都想睇吓究竟呢兩支死敵有冇交換球衣，碧咸有冇同施蒙尼握手，在場英格蘭同阿根廷球迷有冇激動到喊；但係我求大俠計過，呢場波完場後十五秒，收費台嘅製作大員已經將直播鏡頭交番去九展，跟住就開始同現場嗰幾百觀眾開派對，結果全港數以百萬計嘅球迷就完全對於日本嗰邊啲現場氣氛一無所知。
四年難得一見嘅激動一刻，對香港觀眾而言，相信只有喺在場數萬球迷感受到；我哋感受啲乜，咪就係九展氣氛囉，認真吹脹！

捷拉華請勿再射罰球
巴拉圭輸咗畀西班牙後，賽前張牙舞爪嘅捷拉華即刻認低威，承認技不如人，總算有風度。我求大俠只係想勸佢唔好再走出嚟射自由球啦。前日佢射波被人接住後不知幾狼狽身重重回防，隊友辛達告魯斯重為咗佢阻住人哋開波而被罰黃牌。查實艾斯射自由球幾好吖，捷拉華使鬼射咩。