封總話：「你有冇學過佛經呀？逢係初讀佛經，都要背誦，熟讀、識由頭背到落尾之後，佛經存在心中，自己就會潛移默化。公司文化都係要咁樣建立嘅啫，我哋每一條都研究過，認為實際，並可行，並非書生空議論，先至叫員工背誦。每間公司都有唔同環境，亞視以前從冇制度，要員各據山頭，簡直亂龍。我逐步扭番正，亞視需要一啲正氣同正氣人物。第一步就係要定下公司文化規律，如果我哋係滙豐恒生，梗係唔使背啦！」
封總話佢最初入亞視，製作部、節目部爭住做阿頭、爭話事，但到真係有事發生，又冇人肯話關佢事，搞到佢頭暈眼花，於是一怒之下，將製作部撥歸節目部旗下，由節目部領軍，功勞也好，孭鑊也好，節目部孭晒，之後就大家冇交嗌！
封總耳根清淨之餘，發覺辦事效率亦好咗好多！封總話：「做事一定要權責分明，要有人孭得起，否則部門之間就互相推搪，消耗公司資源而做唔到成績出嚟。我道房門經常打開，畀啲夥計隨時走入嚟。以前保安部話我有一道門要鎖埋，為我安全着想喎。我下令一定要開門，消除神秘感，標誌透明公開！」亞視素來被視為一間凌亂冇管理嘅公司，封小平呢種人做總裁，可謂對症下藥。