股壇瀏覽器:石化股升勢難持續

蘋果日報 2002/01/26 00:00


港股噚日繼續牛皮,不過航空股就全線起飛,其中國泰(293)勁升7.1%,重上12元,成交增至3.02億元。南方航空(1055)亦勁升5.2%;東方航空(670)亦升4.9%。
市場憧憬美國經濟將復甦,所以率先炒起航空股,阿虎早在國泰徘徊於6元水平時叫入貨收集,若果有聽阿虎話,相信已經賺唔少。國泰呢次升浪,可能會升至14-15元至收到掣,現價追入利潤雖然唔大,但應該幾穩陣。

東北電傳有外資打救
面臨清盤嘅東北電(042)經過前日急跌後,噚日傳出有外資肯出手相救,股價急升37%,其中以國泰君安買盤最勁,但臨尾又見佢沽番轉頭。
呢個傳聞真定假都幾難分,因為要外資拯救一間上市國企,確係史無前例,相信當中要克服嘅技術因素唔少。
儀征化纖(1033)發出盈利預警後,噚日股價一度挫逾8%,其後有中資入市接貨,跌幅收窄至2%。北京燕化(325)與上海石化(338)更分別上升5%及11%。
黑客話,其實外資早就知道石化股盈利會大倒退,所以一早就減持咗,所以儀征預期盈利大倒退逾50%後,外資都冇咩貨可沽,加上有班中資入市托價,因此噚日石化股不跌反升。不過,呢類股票前景有隱憂,好難持續上升。
先施(244)噚日突然勁升21.4%,收報0.34元。市場又傳出私有化,此股以零售百貨為主,前景黯淡,但就勝在資產淨值高,每股超過兩元以上,作為投機性吸納都唔錯。