組合Morning娘嘅隊長飯田圭織雖然只得二十二歲，但已經成日俾人笑佢年紀大，話佢同啲十四、五歲嘅小妹妹好唔啱feel。唔知係咪因為咁，近日佢搵咗同事務所嘅前雙妹嘜組合Wink成員相田翔子出山，一齊去咗愛琴海拍咗本有成熟韻味嘅《愛琴海相田翔子&飯田圭織寫真集》，我羅拉覺得效果唔錯。

比當年更索
相田雖然已經三十有三，但擁有童顏嘅佢，比十幾年前做當紅偶像時更索。不過相田睇番啲相之後，似乎有小小後悔去到咁盡，佢話：「原來咁大膽㗎！」
而飯田一唔使同班Morning娘扮可愛，就即刻又騷胸又露背，但佢最開心嘅當然係唔使做最老嗰個，詭計得逞嘅佢好開心咁話：「係呀，好似有個姐姐錫咁，呢啲嗲長輩嘅表情相信fans未見過！」
相田同飯田一拍即合，返到日本重夾計做生意，推出地中海味糖果，前日佢哋出席某酒店搞嘅地中海食品展，大sell佢哋設計嘅提子味糖「grapeeX」。飯田更懶係有idea咁話：「我見到愛琴海好多屋都係圓形屋頂，所以有咁嘅構思！」其實，地球上大半嘅糖都係圓形㗎啦！