地產多聲道:維景灣畔玩BB玩到大

蘋果日報 2002/09/09 00:00


太古同新地合作發展嘅將軍澳維景灣畔,最早期用BB仔賣廣告,標榜係下一代成長同生活環境最理想嘅樓盤。太古上個禮拜六搵番曾經為該盤拍過廣告嘅幾個「BB仔」,同太古安格里、馬淑貞一齊為現樓售樓處開幕剪綵。
當年𠵱𠵱呀呀嘅BB,𠵱家已經變咗蹦蹦跳嘅細路仔。睇真啲,其中一名係當時扮太陽花嘅。唔記得佢個樣?攞番一期本樓書嚟睇就知啦,當時圓圓臉兒害羞像紅霞的小人兒,𠵱家已經係會行會走嘅小女孩,重愈大愈靚,正過太陽花。
太古係傳統英資公司,做事作風自然好西化,話說太古學人入鄉隨俗,為維景灣畔售樓處開幕,搞舞獅同切燒豬儀式(祈求生意興隆啩)。安格里可能唔係好識中國習俗,喺獅子採完青後,見到啲青從獅子口拋出嚟,嚇咗一跳;到切燒豬時又雞手鴨腳,更騎呢嘅係,佢竟然用把又長又窄切蛋糕嘅刀嚟切燒豬,鋸咗好耐先入肉,佢啲馬仔認真大整蠱。

舊船廠出租任客舞
西九龍一帶近年大興土木,好似長沙灣船廠重建成泓景臺同昇悅居等大型屋苑,令成個區面貌唔同晒,但附近仍有啲重未發展嘅痕迹。好似喺泓景臺同一條街嘅荔枝角道875號,前身都係船廠,業主因為等待時機重建住宅,所以有意將物業招租,條件重好有彈性,可以話任租客點搞都得。
蘭西問過負責招租嘅中原聯席董事黃偉略,佢話租期可長達十年。租客重可以視乎需要,將現有上蓋拆咗,甚至重建都得,咁樣租金重可以平。
上址屬工業用途,只得一層。
美聯勇奪雷霆盃
喺樓市艱難的日子,由新地雷霆負責嘅新盤,個個都賣個「滿堂紅」,樓神之名,自然當之無愧。蘭西最近睇到美聯有個全版廣告,其中張相係黃主席同下屬手執獎盃,背景係珀麗灣,雷霆個樣就喺張相上面,隔離有段文字話,美聯攞到「雷霆」盃,蘭西睇完覺得好奇怪,因為未聽過新地有搞過呢個盃。唔知係咪雷霆近排人氣旺,代理都借佢個名嚟用一用呢?呢條「橋」當然可以攞到市場注意,但當事人雷生唔知點諗呢?

同行踩盤以牙還牙
長實近年賣樓宣傳作風好進取,喺唔少其他發展商嘅樓盤或示範單位附近,都見到有人派長實樓嘅單張,甚至係售樓書。估唔到喺尖沙嘴嘅凱帆軒示範單位樓下,蘭西噚日竟然見到有人派長沙灣單幢樓順景華庭嘅單張,實行借橋搶番佢啲客,風水輪流轉。

倫敦樓價都係靠鐵路
鐵路網絡發達,可以令樓價升值,好似啱啱通車嘅將軍澳,樓價跌幅就較其他地區細,香港係咁,英國倫敦亦如是!坐落喺倫敦SE16區RotherhitheStreet嘅BombayWharf,鄰近Rotherhithe地鐵站,上個禮拜六嚟港發售,銷售代理高力國際話,該區樓價每年有約一成升幅,今年首季就升咗7.5%。來港展銷嘅樓盤,最平單位258萬,543方呎,每呎4751蚊,呢個價𠵱家喺香港可以買到西半山豪宅,遲啲容乜易貴過香港山頂樓,有興趣嘅買家,點睇?
蘭西
電郵地址:[email protected]