新界鄉議局主席劉皇發的幼子劉業光，去年十二月初為人父，BB女取名卓棉。前晚劉府於屯門自資的酒樓為BB女擺雙滿月酒，其中與劉家相交多年的民政事務總署署長李麗娟，整晚抱着BB女不放，更坐於主家席上，儼如主人家。

新界鄉議局主席劉皇發前晚為孫女劉卓棉擺雙滿月酒，於屯門皇宮酒樓筵開二十八席大宴親朋。劉家上下均有出席，包括年屆八十八歲的劉皇發母親。

全晚做「攝石人」
全場最興奮的賓客，要數與劉家相交多年的民政事務總署署長、「眾人契媽」李麗娟，她全晚抱着B女不放，入席後坐在主家席並坐於劉皇發夫婦中間，儼如劉家的一分子，劉家上下皆不介意李麗娟全晚當「攝石人」。
李麗娟更示範抱BB的正確方法，她說：「我真係好鍾意湊BB，發叔一家嘅細路，我可以話個個都抱過晒。我七九年喺新界民政署跟發叔學嘢，睇住佢啲仔女大㗎。」
問李麗娟這麼喜歡BB，有沒有想過與發叔孫女上契？她笑說：「上契都要講輩分嘅，如果係論輩分嘅，我就係B女嘅auntie婆婆啦！我成日同我個女講，第時佢結婚生咗BB，起碼頭嗰七年都要畀我湊呀。大大話話經我手抱嘅BB，冇十個都有二十個呀，我啲契仔契女重分布全世界。」

13磅B女易湊
發叔前晚透露孫女名字由兒子業光自己改，名卓棉，英文名Jasmine。問發叔送了甚麼給孫女？他說：「都係太太負責啦，我哋係客家人，按傳統都係送金器、玉器同衫仔。」
劉業光太太畢麗君則說：「生B女都幾驚險，因為開刀時佢嘅臍帶一度纏住條頸三個圈，好彩有驚無險啫。」她又表示B女現在重十三磅，很容易湊。