中環利源西街盡掃應節賀年用品
中環商業大廈林立、各式外資名店多不勝數，屬反映香港繁榮豐盛一面的重點商業區。這麼熱鬧風光的一個地段，偏偏就有條以賣廉價衣飾雜物的小巷存在，五十年來都以攤檔形式售賣平價成衣等。直到今時今日，利源西街仍以平價品馳名，不過除卻成衣以外，原來只要留心睇細心搵，重可以發掘到不少獨特的應節新年用品，平平哋為家居及家人添上節日氣氛。 記者：許穗齡
攝影：楊錦文
利源東、西街平價成衣集中地
利源東街及利源西街位於中區，兩條街道平行並列，約由五十年代開始以售賣平價成衣製品為主，屬中下階層人士添衣的好地方，到後來售賣貨品漸趨多元化，但都不離以平價為基準。到今日，產品種類開拓至手表、手袋、家品以至精品都有，近十年亦成為菲律賓等外籍傭工的購物天堂。
1﹒平價應節裝飾品
看似一間普通的平價家品百貨公司，位於利源西街內的舖位，原來開業只有個半月，老闆李先生話𠵱家做零售生意難，選址非常重要，李生就睇準中環較少家品雜貨店舖而開設新店，專做辦公室人士及菲傭生意。而臨近新年，亦選擇了不少新奇特別嘅賀年家品，務求帶旺新店。
特色燈籠揮春
年年過年，年年貼揮春，的確有點沉悶，今年不如改掛上一串串布製大紅燈籠，上面印有賀年字句如「恭喜發財」、「年年有餘」及「一帆風順」等，而且重印有相應的圖案，夠晒搶眼。
售價：每個$68
金元寶地氈
唔鍾意紅噹噹，不如考慮吓呢款金元寶地氈，過時過節放喺門口，以寓來年招來黃金千萬両、家肥屋潤，夠晒好意頭。
售價：每張$28
花形旋轉全盒
過年必備的糖果全盒之中，呢款都算幾特別，花形的膠製糖果盒，不但可以作360度旋轉以便取各式糖果，而且每一格都可以獨立分拆開，既可以分開用又方便清洗。
售價：$120
店名：恒發家居百貨
地址：中環利源西街12-16號
營業時間：上午10:00-晚上8:00
2﹒最新賀年童裝情報
利源西街話晒以平價服飾聞名，嚟到當然要帶大家掃吓平靚正嘅衣物啦！陳小姐呢檔賣成人及童裝過年衣服已有七、八年，今年興咩款式問佢就最清楚。「今年興功夫衫同埋雙面穿着嘅新年衫，都係以絲質為主，而上兩年大熱嘅格格套裝今年重有人問津㗎！」
店名：悅意裳
地址：中環利源西街51號
營業時間：上午11:00-晚上8:00
毛毛背心三十蚊有找
呢件小童裝絲質繡花背心，中間有一層薄夾棉，而領位衫邊均有毛毛做點綴，買嚟送畀小朋友着去拜年就夠晒氣氛又搶眼。
售價：$29
男童保暖功夫衫
陳小姐話今年好多人嚟買功夫衫，好似呢套以黃及黑色為主的童裝功夫衫，以絲質加棉質布做成，重連埋一頂有瓣仔嘅功夫帽，細路哥着上就一定非常醒目。
售價：$79
3﹒賀年內褲迎新歲
不少女士都有着紅色內褲過農曆新年的習慣，不過此舉並非女士專利，此檔老闆娘胡小姐今年就入咗一批男裝嘅賀年內褲，開業三年首次賣男裝內褲，有此突破一來因為見呢幾款男裝內褲夠盞鬼，二來都想喺市道低迷之際開闢新血路。
地址：中環利源西街第五檔
營業時間：上午11:00-下午6:00
禮盒裝旺財內褲
一盒兩條紅色棉質男裝內褲，一條褲頭印有「旺」字，另一條則印有「財」字，屬老闆娘大力推介之款式，而且以精美禮盒包裝，過年送畀親密愛侶就最適合不過。
售價：每套$28
另一款賀年內褲，紅色棉布面繡上一個倒轉的「福」字，寓意福到，設有男女裝。
售價：
女裝$10
男裝$15
4﹒百家姓利是封 全港最齊
李生同李太在中環旺區的一角已經度過六十載，攤檔是由上兩代開始做士多生意，輾轉交由李氏夫婦打理，約十年前開始在過年時節兼賣利是封，可能地點人流高，一直生意都唔錯，就算呢幾年經濟大不如前，都可以保持生意額。
奇難雜姓此中尋
此檔售賣的利是封，論姓氏或款式都非常齊備，陳李張黃何當然有份，鄔甄聶繆都只屬中等難度，連一啲小記都唔多識讀嘅姓氏如磊（音呂）、禤（音喧）等都有得賣，無論你貴姓都應該搵到合心水嘅利是封。
地址：中環德輔道中20號地檔
營業時間：上午7:00-下午6:00