隔牆有耳:楊利偉硬撼反23條 - 李八方

蘋果日報 2008/12/19 00:00


澳門回歸九周年前夕,公佈完成23條立法草擬諮詢工作,大比數贏得澳門人拍爛手掌贊成。澳門民主派唔受呢一套,喺回歸日會打起「反貪腐、保民生、反23條」旗號上街遊行,一批香港泛民成員已一早講明會幫拖,搭船過大海撐場。
有澳門朋友同八方講,澳門政府最叻收買人心嘅招數,除咗早前施政報告派銀紙「水淹」反對聲音,仲好拿手營造歌舞昇平氣氛。澳門當局嘅重頭戲,係請嚟好受歡迎嘅中國首位太空人楊利偉,隨團跟住中國載人航天代表團到訪。聽日喺澳門運動場舉行嘅大滙演,表演嘉賓有李克勤、容祖兒、飛輪海等等,嫌唔夠嘅話,仲有新一代體操王子楊威,咁嘅陣容要吸引一萬人入場,全無難度。