港股上周氣勢如虹，一舉而衝破多個阻力，包括20日線、250日線、12000關口，同埋由高位14058伸延的中期下降軌，恒指上周五一度高見12222，但受制50日線（12197）阻力，尾市回軟，個別熱門國企股更出現單日轉向。
恒指由低位10918回升，短短8日內，急升上12222，共上升1304點，其間升7跌1，動力強橫，雖然中期調整有迹象見底，但由於升得太急（幅度達12%），在50日線之下出現調整，好正常，估計恒指在島嶼裂口水平（11701至11839）可獲支持，因此，調整幅度好有限，橫行整固後，升浪再起，衝破50日線阻力，初步可向12700進發，大升浪目標仍係16000至18000。
國企調整亦應見底，個別股票由低位起計的升幅已有4至5成，唔排除短期內會出現調整，但亦係趁低吸納的大好機會。過去一個禮拜，已見兩資（外資同中資）好積極吸納，下一個升浪，資源股、石化股、電力股同航運股可列為主力追捧對象，其中以3隻鋼鐵股、江銅（358）、中鋁（2600）、海螺（914）、兗煤（1171）、上海石化（338）同鎮化（1128）等可優先選取。

有分拆概念
今次反彈，國企最犀利，二三線股少數拍得住，但大圍表現都跟唔上。股仔通常都係慢熱，短期大市調整，好大機會輪到佢哋發力，短炒有作為；中長線而言，一些盈利會有可觀增長的公司，現時亦可分段收集，下半年嘅大升浪，呢類質優股隨時可食大茶飯。
佑威國際（627）轉型納米業務，已進入收成期，盈利將出現高增長。04年度（3月年結）的上半年，獲利3783萬元，大升98%，全年業績料月內公布，保守估計盈利8200萬元，大升246%，每股盈利6.2仙（已經配售新股調整），以10倍PE計，股價已可見0.62元。家吓係05年度，估計盈利可進一步上升到1.2億元，每股盈利8.5仙，持有1年計，股價有機會升上0.8元水平。
佑威納米業務帶來豐厚收益，若現年度分拆，特殊利潤會好可觀。
郭兆誠