曼聯領隊費格遜果然厲害，佢雖然猛話喺今屆世界盃同自己嘅愛徒、英格蘭嘅碧咸同埋阿根廷嘅華朗打氣，重話喺世界盃期間打埋電話畀佢哋教路；點知原來佢講一套做一套，自己喺世界盃展開前，已經下注二千鎊（約二萬三千二百港元）買巴西奪標，當時巴西嘅賠率係九倍，結果就贏咗二萬鎊。
當「老費」俾人踢爆點解唔買英格蘭或者阿根廷win，反而買巴西時，佢就只係笑笑口咁話：「最重要係贏錢啫！」咁都俾佢兜得到，我求大俠真係服咗佢。

羅比堅尼嫌棄新特蘭
列斯想散貨，首當其衝嘅係愛爾蘭前鋒羅比堅尼，不過佢就話點都唔想轉會。我求大俠就覺得，其實喺列斯冇得踢正選嘅羅比堅尼唔係唔想走，只係唔想去新特蘭呢啲未開季都幾近降班嘅東北球會啫！

托度話踢世盃似度假
意大利後備龍門托度日前炮轟教練查柏東尼，話後者來來去去都用死一班正選，搞到成班後備響世界盃都唔知做啲咩，似度假多過比賽。查柏東尼講明會繼續教意大利，托度咁講嘢因住第日連後備都無得做喎。